Հռոմի պապ Ֆրանցիսկոսը սեպտեմբերի 26-ին ԱՄՆ այցի շրջանակներում ժամանել է Փենսիլվանիա նահանգի Ֆիլադելֆիա քաղաք: Քաղաքի միջազգային օդանավակայանում նրա համար կազմակերպել են հանդիսավոր հանդիպում: Դրա ամենահիշարժան պահն ամբողջ աշխարհում հայտնի Gonna Fly Now երաժշտությունն էր «Ռոքի» ֆիլմից, որը կատարեց տեղի նվագախումբը: Այս մասին գրում է TASS-ը: Ֆիլմը նկարահանվել է հենց Ֆիլադելֆիայում:
Օդանավակայանից քաղաք ճանապարհին քահանայապետը մարդկանց բազմության մեջ նկատել է հաշմանդամի սայլակով 10-ամյա մի տղայի: Վարորդին կարգադրելով կանգնել՝ նա մոտեցել է տղային, ձեռքը դրել նրա գլխին և համբուրել ճակատը: Տղայի մայրը՝ Քրիսթին Քիթինգը, ասել է, որ դեռևս 6 տարեկանում իր որդու մոտ բժիշկները ախտորոշել են ուղեղի կաթված, ուստի Մայքլը վատ է տեսնում և լսում, չի կարողանում ինքնուրույն տեղաշարժվել:
Նրա խոսքերով՝ առավոտյան որդին իրեն նյարդային էր պահում, սակայն Հռոմի պապի ներկայությամբ հանգստացել է:
«Երբ Հռոմի պապը ձեռքը հեռացրեց նրա ճակատից, Մայքլի դեմքին ժպիտ կար: Իմ կարծիքով՝ նա ինչ-որ կերպ հասկացավ, որ իրեն օրհնեցին»,- ասել է Քրիսթինը:
