ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ջեյմս Ուորլիքը (ԱՄՆ), Պիեր Անդրիուն (Ֆրանսիա) Հայաստանին ու Ադրբեջանին կոչ են արել ընդունել մեխանիզմներ՝ հետաքննելու համար հրադադարի ռեժիմի խախտումները: Այս մասին ասվում է ԵԱՀԿ մամլո ծառայության հաղորդագրությունում:
Այդ կոչով համանախագահները հանդես են եկել Հայաստանի և Ադրբեջանի արտգործնախարարներ Էդվարդ Նալբանդյանի և Էլմար Մամեդյարովի հետ հանդիպման ժամանակ:
Նշենք, որ սեպտեմբերի 24-ին ԵԱՀԿ Մինսկի խմբի համանախագահները հանդիպել են Հայաստանի արտգործնախարար Էդվարդ Նալբանդյանի, իսկ սեպտեմբերի 25-ին՝ Ադրբեջանի արտգործնախարար Էլմար Մամեդյարովի հետ:
Քննարկվել է հայ և ադրբեջանական զորքերի շփման գծում լարվածությունը մեղմելու անհրաժեշտությունը:
Հանդիպմանը ներկա է եղել նաև ԵԱՀԿ գործող նախագահի անձնական ներկայացուցիչ դեսպան Անջեյ Կասպրշիկը:
ԵԱՀԿ Միսնկի խումբը քննադատել է երկու երկրների զորքերի շփման գծում վերջին էսկալացիան՝ հրետանու կիրառմամբ, որը հանգեցրել է մարդկային զոհերի:
