Մայիսի 5-ին կայանալիք Երևանի ավագանու ընտրություններում հաջողության կհասնի այն ուժը, որը ժողովրդի հետ ազնիվ է եղել: «Առաջին լրատվական»-ի հետ զրույցում ասաց «Ժողովրդավարական ուղի» կուսակցության ղեկավար Մանուել Գասպարյանը՝ անդրադառնալով Երևանի ավագանու ընտրություններին:
Ըստ Մանուել Գասպարյանի՝ գալիք ընտրություններից հետո ժողովուրդն իր համար շատ բան կպարզի, կունենա պատկերացում, թե ով ինչի համար է պայքարում, ով է իր «ես»-ի ու անձնական շահի համար պայքարում, իսկ ով՝ լայն շերտերի շահերով առաջնորդվում: Մանուել Գասպարյանի խոսքով՝ Երևանի ավագանու ընտրություններում ձայն կստանա այն ուժը, որը ժողովրդի հետ եղել է արդար բոլոր ժամանակներում, բոլոր ընտրություններում և վերջին ընտրություններից հետո անմասն չի մնացել ժողովրդի համախմբված պայքարից:
ԺՈւԿ նախագահը սխալ է համարում, որ պայքարի թոհուբոհից հեռու մնալով՝ կուսակցությունները փորձում են իմիտացիոն ձևերով, գեղեցիկ խոսքերով, առանց գործողության ժողովրդից քվե վաստակել, այն ուժերը, որոնք նախորդ ընտրություններին մեծ ներկայություն ստացան խորհրդարանում: «ԲՀԿ-ի և ՀԱԿ-ի մասին է խոսքը: Նրանք փորձում են իրենց ձևերով՝ ԱԺ-ում այս փոխենք, արտահերթ նիստ հրավիրենք, որոշակի քվե ձեռք բերել գալիք ընտրություններում: Դա կապիկություն է, ո՞վ չգիտի, որ երկրի նախագահը խորհրդարանում մեծամասնություն ունի, ի՞նչ կարող է փոխվել ԱԺ արտահերթ նիստով: ՍԴ դիմում էին ներկայացնում, ի՞նչ փոխվեց: Եկեք ժողովրդի կողքին կանգնեք, արտախորհրդարանական պայքար տարեք, այլ ոչ թե խորհրդարանում ձևացրեք, թե լավ ընդդիմություն եք»,- ասաց Մանուել Գասպարյանը:
Իսկ թե ինչ են փորձում ստանալ այդ ուժերը՝ մասնակցելով Երևանի ավագանու ընտրություններին, Մանուել Գասպարյանը դժվարացավ ասել: Ըստ նրա՝ հստակ է, որ գալիք ընտրությունները միմիայն քաղաքական բովանդակություն ունեն և սպասվում է քաղաքական պայքար:
