2012 թվականի մայիսին կայացած խորհրդարանական ընտրություններից առաջ ձևավորվեց ընտրակեղծիքները կանխող միասնական շտաբ, որի անդամներն էին «Բարգավաճ Հայաստանը», Հայ ազգային կոնգրեսը և Դաշնակցությունը: «Ժառանգությունն» այն ժամանակ հրաժարվեց միասնական շտաբի անդամ դառնալ: Դրա համար տարբեր պատճառաբանություններ բերվեցին՝ նախ կուսակցության անդամներն ուզում էին, որ, իրենց իսկ կարծիքով, մինչ այդ միշտ ընտրակաշառք բաժանած «Բարգավաճ Հայաստան» կուսակցությունը խոստանա, որ այլևս կաշառք չի բաժանելու: Նման խոստում, իհարկե, չհնչեց, և արդյունքում ստացվեց այն, ինչ արձանագրվեց ընտրություններից հետո:
Մայիսի 5-ին կայանալիք Երևանի ավագանիի ընտրությունների նախաշեմին արդեն իսկ միասնական շտաբ ձևավորելու խոսակցություններ են պտտվում: Պարզելու համար՝ արդյոք շտաբի վերջնական ձևավորման դեպքում «Ժառանգությունը» այս անգամ կմիանա՞, թե՞ կրկին հին կազմը կլինի, «Առաջին լրատվական»-ը զրուցեց կուսակցության փոխնախագահ, Երևանի ավագանիի ընտրություններին «Բարև, Երևան» դաշինքի համամասնական ցուցակի առաջին համար Արմեն Մարտիրոսյանի հետ:
Վերջինս նշեց, որ այս պահին իրենց գրավոր ոչ մի առաջարկ չի եղել, իսկ լինելու դեպքում բնականաբար կքննարկեն. «Քայլերը կներկայացնեն, բացի այդ՝ մենք մեր քաղաքացիներից պետք է այնպիսի տեսակետ ունենանք, որ իրենք բովանդակային քայլեր են անում՝ այդ ժամանակ նոր կմտածենք այդ ուղղությամբ, այս պահին որևէ մեկը մեզ գրավոր առաջարկ չի ներկայացրել»:
Հարցին՝ կկարևորի՞ «Ժառանգությունը», թե կոնկրետ որ կուսակցությունները կլինեն շտաբի անդամ, Ա. Մարտիրոսյանն ասաց. «Ոչ թե կուսակցությունների անուններն են կարևոր, այլ այն, թե այդ կուսակցությունները ինչպիսի քարոզչություն են իրականացնելու, արդյո՞ք իրենք իրենց հայտարարած սկզբունքների շրջանակում են գործելու, թե՝ ուրիշ: Օրինակ՝ նախկինում եղել է, որ հայտարարվում էր, թե ընդդիմադիր մի կուսակցությունը մյուսի վրա սև փիառ չի անելու, բայց ամբողջ, այսպես ասեմ, սև փիառը և ոչ թե քննադատությունը մեր վրա էր ուղղված՝ կոնկրետ 2012-ին, ոչ այնքան իշխանություններին էին քննադատում, որքան մեր նկատմամբ սև փիառ էին իրականացնում»:
Ա. Մարտիրոսյանին խնդրեցինք անդրադառնալ նաև իրենց նախկին մտահոգությանը՝ առ այն, որ ԲՀԿ-ն կաշառք է բաժանել, և արդյո՞ք չկա այդ նույն մտավախությունն այսօր. «Այն ժամանակ խնդիրը ոչ միայն ընտրակաշառքն էր, իհարկե մենք ահազանգեր ստացել էինք, չեմ ուզում ասեմ կոնկրետ որ կուսակցությունների կողմից, բայց համենայնդեպս մենք բովանդակային քայլերի կողմնակից ենք եղել և ցանկացած պարագայում այն, ինչ հրապարակայնացվում է՝ մենք ցանկանում ենք պրակտիկայում ևս տեսնել»:
