Բրազիլիայի Գոյաս նահանգի Գոյանիա քաղաքում ցույցի մասնակիցները 6 ավտոբուս են հրկիզել: Նրանք բողոքում են հասարակական տրանսպորտի երթուղիների կրճատման դեմ, հայտնում է O Globo թերթի էլեկտրոնային տարբերակը: Քաղաքային տրանսպորտային ընկերությանը պատկանղ ևս մի քանի ավտոմեքենաների ապակիներ ցուցարարները կոտրել են քարերով և կրակմարիչներով:
Քաղաքի արվարձանների բնակիչները հավաքվել են ցույցի՝ դժգոհություն հայտնելու տեղի իշխանությունների նախաձեռնությունից, որի համաձայն՝ հիմնական ավտոբուսային երթուղիները պետք է անցնեն հեռավոր շրջաններից հեռու: Այդ փոփոխությունների արդյունքում շատ քաղաքացիներ ստիպված պիտի լինեին տնից աշխատավայր ճանապարհի վրա ավելի շատ ժամանակ ծախսել:
Մոտ 6 ժամ տևած հրկիզումներն ու ջարդերը դադարել են միայն ռազմական ոստիկանության միջամտությունից հետո: Նախնական տվյալներով՝ վնասը կազմել է մոտ 1,5 մլն դոլար: Դեպքից հետո քաղաքային տրանսպորտային ընկերության ներկայացուցիչներն ընդառաջել են տեղի բնակիչներին և համաձայնել են, որ նախկին ավտոբուսային երթուղիները մնան ամենախիտ ժամերին: