Խաղաղության Նոբելյան մրցանակի շնորհման կոմիտեն մեղադրել է կոմիտեի նախկին քարտուղար Գեյր Լունդեսթադին վստահության չարաշահման մեջ՝ կապված վերջին տարիներին մրցանակի շնորհման մասին նրա «Խաղաղության քարտուղար» գրքի հրապարակման հետ: Այս մասին հայտնում է Reuters-ը:
«Լունդեսթադը մի քանի անգամ խախտել է գաղտնի տեղեկության չհրապարակման հետ կապված իր պարտավորությունները»,- ասվում է կոմիտեի հայտարարության մեջ գրքի վերաբերյալ, որը վաճառքի է հանվել անցած ուրբաթ: Գաղտնի տվյալները չպետք է բացահայտվեին 50 տարի:
Գրքում նշվում է, որ 2009թ. ԱՄՆ նախագահ Բարաք Օբամային մրցանակի շնորհումը չի արդարացրել հույսերը: Մրցանակը պետք է նախագահի համար խթան լիներ, սակայն նա չկարողացավ նպաստել միջազգային հակամարտությունների խաղաղ կարգավորմանը:
Հայտարարության համաձայն՝ հեղինակը գրքում ավելացրել է «մարդկանց և գործընթացների նկարագրություններ, որոնք տեղի են ունենում կոմիտեի ներսում»՝ չնայած 2014թ. ստորագրած գաղտնիության մասին համաձայնագրին:
Հայտարարության տեքստը չի պարունակում ոչ մի տվյալ կոմիտեի նախկին քարտուղարի հանդեպ հնարավոր պատժամիջոցների մասին: