Անցած շաբաթ Ավստրալիայի կառավարության ղեկավարի փոփոխությունը հանգեցրել է երկրում իշխող Լիբերալ-ազգային կոալիցիայի ժողովրդականության զգալի աճի: Այս մասին հայտնում է TASS-ը:
Սեպտեմբերի 14-ին լիբերալ-խորհրդարանականների քվեարկության արդյունքում կուսակցության նոր ղեկավար է ընտրվել Մալքոլմ Թերնբուլը, հաջորդ օրը նա երդմնակալել է որպես վարչապետ:
Երեքշաբթի Newspoll ծառայության հրապարակած հարցման արդյունքներով՝ իշխանության փոփոխությունից անմիջապես հետո իշխող կոալիցիային աջակցելու մասին հայտարարել է հետազոտության մասնակիցների 51%-ը (5%-ով ավելի, քան նախորդ նման հարցման ժամանակ, երբ վարչապետն Էբոթն էր): Ընդդիմադիր Լեյբորիստական կուսակցությանն աջակցել է հարցվածների 49%-ը:
Սակայն ավելի մեծ հաջողություն է գրանցել անձամբ նոր վարչապետը, որին աջակցել է հարցվածների 55%-ը, մինչդեռ լեյբորիստների առաջնորդ Բիլլ Շորթենի անձնական վարկանիշը երկու շաբաթում 41%-ից նվազել է մինչև 21%:
