Տարոն Մարգարյանի թեկնածուական թեզի պաշտպանության օրվանից հանրությանը քաջ հայտնի Սաքուլիկը՝ Սևակ Խաչատրյանը, քիչ առաջ ՀՀ պաշտպանության նախարար Սեյրան Օհանյանի կողմից պարգևատրվեց սպարապետ Վազգեն Սարգսյանի անվան շքանշանով։
Բացի նրանից, որ Սևակ Խաչատրյանը հայտնի է այդ օրը լրագրողների նկատմամբ անպարկեշտ վարքագծով, նրանց հասցեին հնչեցրած սեռական բնույթի հայհոյանքներով, նա նաև խուսափել է զինվորական ծառայությունից։ Սևակ Խաչատրյանը այդ սխրագործությունից հետո արժանացել էր պրոռեկտորի պաշտոնին, իսկ այսօր արդեն սպարապետի մեդալի։
Նրանից բացի՝ ծառայությունից խուսափած մի քանի ուսանողներ ևս արժանացան նման պարգևների։ Սա այն դեպքում, երբ դրանից առաջ Սեյրան Օհանյանը ուսանողներով լեցուն դահլիճում մեկ ժամ քարոզ էր կարդում բանակի ու ծառայության մասին։ Նա անգամ հեռավոր սահմաններից դահլիճ էր հրավիրել ինստիտուտի ուսանող զինվորներին, որոնց լավ ծառայության համար պարգևատրեց արձակուրդով։ Պարզվեց՝ և՛ սահմանին կանգնած զինվորը, և՛ Հանրապետական կուսակցության շարքերից մի քանի անգամ զորամասեր տուրիստական այցեր կատարած ակտիվիստները հավասարազոր են իրար, և երկուսն էլ արժանի են բարձր պարգևների։
Այս արարողությունից հետո «Առաջին լրատվական»-ը Սեյրան Օհանյանից հետաքրքրվեց՝ սկանդալային վարքագծով ու ծառայությունից խուսափած պրոռեկտոր Սևակ Խաչատրյանը ո՞ր արժանիքների համար պարգևատրվեց Վազգեն Սարգսյանի անվան մեդալով։ Պաշտպանության նախարարը հպարտությամբ հիշատակեց նրա հասարակական գործունեությունը։ «Այսօրվա բոլոր պարգևատրվողները համապատասխան աշխատանք են կատարել բանակ-հասարակություն, բանակ-բարձրագույն ուսումնական հաստատություններ կապի շրջանակում, և նաև ռազմահայրենասիրական դաստիարակության մեջ իրենց ներդրումն ունեն։ Նախկինում ինչ են կատարել՝ չգիտեմ և չեմ էլ ուզում իմանամ, այսօր նրանք աշխատում են, և այն պարգևատրումները, որ կատարում եմ՝ մանրակրկիտ նայում եմ»,- վստահեցրեց պաշտպանության նախարարը։
Հարցին՝ ճշտե՞լ է, ծառայե՞լ են պարգևատրվածները, Սեյրան Օհանյանը ոչ ավել, ոչ պակաս արդարացրեց ծառայությունից խուսափելը։ Հիշեցրեց՝ կրթական մարմաջով օրենքի շրջանակում են ազատվել։ Եթե սա Սեյրան Օհանյանի համար շատ համոզիչ է, ապա հանրության լայն զանգվածները շատ լավ գիտեն, որ սաքուլիկների նման ասպիրանտները, որոնք հիմնականում ՀՀԿ-ի կարիերիստ ակտիվիստներն են, «գիտնականներ» են դարձել բանակից խուսափելու նպատակով։ Հակառակ դեպքում, թող գիտնական դառնալուց հետո հայրենիքի հանդեպ իրենց պարտքը գնան կատարեն։
Ամեն դեպքում, արդյո՞ք ծառայությունից խուսափած ու սկանդալային վարքագծով հանրությանը հայտնի հանրապետականներին բարձր պարգևներով խրախուսելը չի նշանակում, որ հայրենիքին ու բանակին նվիրված Օհանյանի մեկ ժամանոց դասախոսությունն իզուր էր և իր գործողություններով ճիշտ հակառակի քարոզչությունն արեց։ «ՀՀ-ում անօրեն որևիցե մեկը չի ազատվում զինվորական ծառայությունից, այն քաղաքացիները, որոնք կրթության պատճառով ասպիրանտ են եղել ու ազատվել են, իրենց գործունեությունը ծավալում են ի աջակցություն բանակի, մեր հասարակության։ Այդպիսի մեդալներ տրվում են նաև հասարակական գործունեության համար, որոնք ուղղված են ռազմահայրենասիրական դաստիարակությանը»։
Ստացվում է՝ պատերազմական վիճակում գտնվող Հայաստանի Հանրապետությունում ռազմահայրենասիրական դաստիարակությամբ զբաղվում են բանակից փախած, Հանրապետական կուսակցության տանիքի տակ ծվարած կարիերիստ սաքուլիկները։