Գյումրիի գլխավոր կամուրջը կառուցվել է 1976 թվականին: Այն իրար է միացնում քաղաքի երկու խոշոր փողոցները` Գարեգին Նժդեհն ու Շիրակացին: Կամուրջը անվանում են նաև Ալեք Մանուկյանի անունով, քանի որ գտնվում է համանուն փողոցի շարունակության վրա: Կամրջին մոտ գտնվում են երկու բանկ, մեկ սուպերմարկետ, մեկ դպրոց մի շարք հիմնարկներ, իսկ արդեն ներքևում մի ողջ թաղամաս է, որ գյումրեցիները անվանում են Ձորի մայլա:
88-ի աղետին այն ենթարկվել է մասնակի փլուզումների: Որոշակի վերանորոգումներ իրականացվել են իհարկե, սակայն դեռ երկու հազարականների սկզբներին և ահա մեկ տարի առաջ էլ հատուկ ուսումնասիրություն են իրականացրել Սեյսմիկ պաշտպանության ազգային ծառայության հյուսիսային բաժանմունքի մասնագետները և եկել այն եզրակացության, որ Գյումրիի գլխավոր կամուրջը ենթակա է վերանորոգման, քանի որ տարիների ընթացքում ենթարկվել է մթնոլորտային և այլ ազդեցությունների, տեղ-տեղ առկա են բետոնի քայքայված հատվածներ: Բացի դրանից՝ կամրջի արևելյան մասում առկա է հիմնակիր լանջի գրունտի թուլացում, ինչի պատճառը ոչ ճիշտ ջրահեռացման իրականացումն է:
Խնդրի առնչությամբ հնչած ահազանգերին ի պատասխան «Առաջին լրատվական»- ը փորձեց պարզաբանումներ ստանալ Գյումրու քաղաքապետարանից: Ի պատասխան, Գյումրու քաղաքապետի մամլո խոսնակ Լիլիթ Մակարյանը «Առաջին լրատվական»- ին տեղեկացրեց. Գյումրու գլխավոր կամուրջի վրա մեծ չափի պատռվածքներ չկան: Նորմալ շահագործելի վիճակում են գտնվում նաև հիմնական կոնստրուկցիաները: Իհարկե այս տարիների ընթացքում խնդիրներ առաջացել են, սակայն լայնածավալ աշխատանքների համար վիթխարի գումարներ են անհրաժեշտ, որպիսիք համայնքային բյուջեում պարզապես չկան: Ներկա պահին մենք համապատասխան դիմում ենք ներկայացրել Կապի և տրանսպորտի նախարարություն և սպասում ենք պատասխանի: Ընդհանուր առմամբ կամուրջը շահագործելի է»:
Նշենք, որ կամուրջն ունի ստրատեգիական նշանակություն:
