Այսօր ԱԺ ԲՀԿ պատգամավոր Վարդան Բոստանջյանը մեզ հետ զույցում նշեց, որ այո, մարտի 1-ի վերաբերյալ Սերժ Սարգսյանի խորհրդակցությունը դատաիրավական համակարգի հետ կարելի է համարել Լևոն Տեր-Պետրոսյանի առաջ քաշած պահանջներից մեկի արձագանք:
Նրա խոսքերով, սակայն, անկախ արձագանքից` մարտի 1-ը մեզ համար չլուծված խնդիր է, հետևաբար այս հարցին պետք է տալ հնարավոր սպառիչ պատասխան, իսկ Սերժ Սարգսյանը երեկվա խորհրդակցության ժամանակ պահանջեց նաև այդ հարցը, որ այդ խարանը երկրի վրայից դուրս գա:
«Ես համոզված եմ, որ Մարտի 1-ի առումով հանրապետության նախագահը գրեթե առնչություն չունի: Կարծում եմ, որ ինքը շատ կուզենա, որ հնարավոր ձևով մեղավորները պատժվեն»,- նկատեց Վարդան Բոստանջյանը:
Մեր այն դիտարկմանը, թե իշխանությունները Լևոն Տեր-Պետրոսյանի ելույթից հետո նշեցին, որ չեն պատրաստվում ուլտիմատումներին արձագանքել, հետևաբար կարելի՞ է Սերժ Սարգսյանի այս քայլը համարել պարտություն` պատասխանեց. «Բոլոր պարագաներում ուլտիմատումները, վերջնագրերը քաղաքականության մեջ չընդունված երևույթներ են: Սա պարզապես այն պահն է, որը թույլ է տալիս անդրադառնալ այս գործին, ինչը արեց Սերժ Սարգսյանը»: