«Կասպերսկու լաբորատորիան» ճշտում է Կասպերսկու որդու առևանգման մասին լուրը:
Ինչպես գրում է Life News կայքը, համակարգիչների համար հակավիրուսային ծրագրերի ամենահայտնի մասնագետներից մեկի` Եվգենի Կասպերսկու որդուն` Իվանին, առևանգել են Մոսկվայում: Կասպերսկու կողմից ստեղծված Kaspersky Lab-ի մամլո ծառայությունից Газета.Ru կայքին ո՛չ հերքել, ո՛չ էլ հաստատել են այդ տեղեկությունը:
«Մենք դեռևս տեղեկություն չունենք այդ հարցի կապակցությամբ: Մենք ո՛չ կարող ենք հաստատել, ո՛չ էլ հերքել այդ տեղեկությունը», – ասել են ընկերությունում` ավելացնելով, որ ներկա պահին լուրը ճշտվում է:
«Առևանգողները Եվգենի Կասպերսկու 20-ամյա որդու համար նրանից 3 մլն դոլար փրկագին են պահանջում»,- գրում է Life News-ը` հղում կատարելով սեփական աղբյուրներին: Կայքի փոխանցմամբ, տղային գողացել են ապրիլի 19-ին, Մոսկվայի հյուսիսարևմտյան շրջանից, երբ Իվանը աշխատանքի էր գնում:
Տեղեկացնենք, որ 46-ամյա Եվգենի Կասպերսկին1997 թ.-ին դարձել է «Կասպերսկու լաբորատորիայի» հիմնադիրներից մեկը: Նա ամուսնալուծված է և ունի երեք երեխա: Իվանը Եվգենիի կրտսեր որդին է: Նա սովորում է Մոսկվայի պետական համալսարանի կիրառական մաթեմատիկայի և կիբեռնետիկայի ֆակուլտետի չորրորդ կուրսում:
