Իտալիայի վարչապետ Մարիո Մոնտին երեքշաբթի երեկոյան ժամանակավորապես ստանձնել է արտգործնախարարի պարտականությունների կատարումը՝ կապված հրաժարականի մասին արտգործնախարար Ջուլիո Տերցիի անսպասելի հայտարարության հետ: Այս մասին հայտնում է RIA Novosti-ն:
Տերցին նման քայլի է դիմել պատգամավորների պալատում լսումներից անմիջապես հետո: Լսումների ժամանակ քննարկվել է իտալացի զինվորական նավաստիներ Մասիմմիլիանո Լատորեի և Սալվատորե Ջիրոնեի ճակատագրի հարցը: Ներկայում նրանք Հնդկաստանում սպասում են իրենց կողմից հնդիկ ձկնորսների սպանության գործով դատարանի որոշմանը:
Անցած ուրբաթ երկու զինվորականները վերադարձել էին Հնդկաստան, թեև ավելի վաղ Իտալիայի ԱԳՆ-ն հայտարարել էր, որ նավաստիները, որոնց Հնդկաստանի իշխանությունները թույլ են տվել հայրենիք վերադառնալ փետրվարին կայացած ընտրություններին մասնակցելու համար, դատարան չեն վերադառնա:
«Ես դեմ էի զինվորական նավաստիներին Հնդկաստան ուղարկելուն, սակայն իմ ձայնը չլսվեց»,- խորհրդարանում հայտարարել է Տերցին:
