Սիրիայի ընդդիմադիր և հեղափոխական ուժերի ազգային կոալիցիայի առաջնորդ Ահմեդ Մուազ Ալ-Խատիբը Արաբական պետությունների լիգայի գագաթնաժողովի բացմանը պահանջել է Սիրիայի ընդդիմադիր ուժերին տեղ հատկացնել ՄԱԿ-ում՝ հաղորդում է RIA Novosti-ն:
«Մենք մեր արաբ եղբայրներից և ընկերներից խնդրում ենք օգնել մեզ՝ ստանալու Սիրիայի տեղը ՄԱԿ-ում և այլ միջազգային կազմակերպություններում»,- հայտարարել է Ալ-Խատիբը:
Նա նաև ընդգծել է, որ ընդդիմությունը միջազգային թատերաբեմում պետք է փոխարինի Սիրիայի պաշտոնական ներկայացուցիչներին: Ալ-Խատիբը պահանջել է նաև սառեցնել «Բաշար Ալ-Ասադի վարչակարգի» բոլոր հաշիվները:
Հիշեցնենք, որ Սիրիայի ազգային կոալիցիան Դոհայում ԱՊԼ գագաթնաժողովում զբաղեցրել է Սիրիայի տեղն այն բանից հետո, երբ կազմակերպության անդամ պետությունների մեծ մասն աջակցել են Կատարի այդ առաջարկին: Սիրիայի անդամակցությունն ԱՊԼ-ին դադարեցվել էր 2011թ. նոյեմբերին:
