«Առաջին լրատվական»-ի տեղեկություններով՝ «Ալադդին» ռեստորանային համալիրում օրեր առաջ միջադեպ է տեղի ունեցել: Մեր աղբյուրների փոխանցմամբ՝ վիճաբանության ժամանակ պակիստանցի ամուսինը փակ գանգուղեղային տրավմա է հասցրել 22-ամյա, ազգությամբ հայ կնոջը: Մեզ հետ զրույցում լուրը հաստատեցին ՀՀ ոստիկանության հասարակայնության հետ կապի և լրատվության բաժնից:
Մարտի 21-ին ՀՀ ոստիկանության Երևան քաղաքի վարչության Քանաքեռ-Զեյթունի բաժին «Սուրբ Գրիգոր Լուսավորիչ» ԲԿ-ից հաղորդում է ստացվել, որ «փակ գանգուղեղային տրավմա, ուղեղի ցնցում» ախտորոշմամբ իրենց մոտ բուժօգնության է դիմել 1991 թ. ծնված Տաթևիկ Խ.-ն: Վերջինս իր մոտ մեկնած ոստիկանական խմբին բացատրություն է տվել, որ նշված վնասվածքը ստացել է «Ալադդին» ռեստորանի աստիճանների վրա վայր ընկնելու հետևանքով:
Սակայն ձեռնարկված օպերատիվ-հետախուզական գործողությունների արդյունքում պարզվել է, որ մարտի 20-ին ժամը 22.00-ին նշված ռեստորանում վիճաբանության ժամանակ Տաթևիկի գլխին բռունցքով հարվածել և վնասվածք է պատճառել նրա ամուսինը՝ Պակիստանի քաղաքացի, 1967 թ. ծնված Ասիֆ Ալլահ Դիդայի Մուհամմեդը:
Նշանակվել է դատաբժշկական փորձաքննություն: Կատարվում է նախաքննություն:
