Հայաստանում ստեղծված ներքաղաքական իրավիճակի ելքը կախված է ոչ այնքան քաղաքական լիդերներից, որքան ժողովրդի պահանջատիրության շարունակականությունից և հաստատակամությունից: Այս մասին «Առաջին լրատվական»-ի հետ զրույցում ասաց «Կալիֆոռնիա Կուրիեր» թերթի խմբագիր և հրատարակիչ Հարութ Սասունյանը, ով այս օրերին Հայաստանում է:
Հարութ Սասունյանի գնահատմամբ՝ այն, ինչ այսօր խաղաղ, հանդարտ պայմաններում, մարդկանց ազատ կամարտահայտման շրջանակում տեղի է ունենում Հայաստանում, պետք է շարունակվի: Ըստ նրա՝ այս քաղաքական պահանջատիրությունը դրական երևույթ է: Վերջին քսան տարիներին գալով Հայաստան՝ նա ականատես է եղել, թե ինչպես են ժողովրդի շրջանում գլուխ բարձրացնում ահռելի հուսալքությունը, հուսախաբությունը, որի արդյունքում մարդիկ երկրից փախչում են:
«Հիմա որոշ շրջանակների մեջ նկատում եմ ավելի քաղաքական կեցվածք, պահանջատիրություն: Մարդիկ ուզում են ազատ ընտրություններ, դեմոկրատիա, ուզում են ազատ խոսք: Եթե այսպես շարունակվի, ժողովուրդն իսկապես տեր կկանգնի իր երկրին ու իրավունքներին: Դա, կարծում եմ, շատ դրական է, խոսում է ժողովրդավարության մասին, քանի որ ժողովրդավարության դեպքում է, որ ամեն մարդ իրավունք ունի իր կարծիքն արտահայտելու և պահանջատեր լինելու: Հուսամ՝ բռնարարքներ տեղի չեն ունենա, և քաղաքակիրթ ձևով ժողովրդի պահանջները կընդունվեն»,- մեկնաբանեց Հարութ Սասունյանը:
Նրա կարծիքով՝ ստեղծված իրավիճակից ելքն ինչ-որ առումով կախված է նախագահի նախկին թեկնածուներից, ազդեցիկ քաղաքական ուժերի ղեկավարներից և նրանց դիրքորոշումից: Սակայն, ամերիկահայի համոզմամբ, ավելի ազդեցիկ ու կարևոր է ժողովրդի պահանջատիրությունը: Հարութ Սասունյանը նշեց, որ ժողովրդի կամքից է կախված ելքը, ոչ թե որևէ անհատի դիրքորոշումից:
«Վերջիվերջո՝ պետք է հարգել մեր ժողովրդի փափագը, եթե մի քանի մլն մարդ ինչ-որ բան է պահանջում, մի քանի մլն-ի կարծիքը կարևոր է»,- նկատեց նա:
Հարցին՝ հնարավո՞ր է, որ այս օրերին միանա Րաֆֆի Հովհաննիսյանին և ժողովրդի այն հատվածին, որն Ազատության հրապարակում է, Հարութ Սասունյանը պատասխանեց՝ ինքը ժողովրդի հետ է ամեն օր և ոչ միայն այսօր:
«Րաֆֆի Հովհաննիսյանի հետ երկար տարիների ընկերներ ենք՝ սկսած Լոս Անջելեսից, և այն, ինչ ինքն անում է, նորմալ է ինձ համար: Դրական եմ գնահատում, որովհետև ժողովուրդը սկսում է արթնանալ: Ինչ վերաբերում է նրան հանդիպելուն՝ խնդիր չեմ տեսնում: Միակ հարցն այն է, որ չեմ ցանկանում իմ հանդիպումն իր հետ վերածվի քաղաքական շոուի՝ տեսախցիկների առջև: Կնախընտրեի առանձին հանդիպել. եթե առիթ լինի առանձին հանդիպելու, կհանդիպեմ»,- եզրափակեց իր խոսքը Հարութ Սասունյանը:
Տեղեկացնենք, որ Հարութ Սասունյանը Հայաստանում է՝ մասնակցելու անցյալ ուրբաթ և շաբաթ օրերին Երևանում կայացած Հայոց ցեղասպանության գիտաժողովին, որի ընթացքում ելույթ է ունեցել և ներկայացրել Հայոց ցեղասպանության 100-ամյա տարելիցին ընդառաջ անելիքները: