ԱՄՆ-ը Աֆղանստանի հետ ձեռք է բերել պայմանավորվածություն Փարվան գավառի (գտնվում է Քաբուլից 60 կմ հեռու) հատուկ բանտի վերահսկողությունը տեղի իշխանություններին փոխանցելու վերաբերյալ: Այս մասին հայտնել է Պենտագոնի պաշտոնական ներկայացուցիչ Ջորջ Լիթլը՝ փոխանցում է ITAR-TASS-ը:
Որոշումն ընդունվել է ԱՄՆ պաշտպանության նախարար Չակ Հեյգելի և Աֆղանստանի նախագահ Համիդ Քարզայի հեռախոսազրույցի ժամանակ:
Մինչև վերջին ժամանակներս այդ հարցը լուրջ հակասություններ էր առաջացրել Վաշինգտոնի և Քաբուլի միջև: ԱՄՆ-ը մտավախություն ուներ, որ եթե հատուկ բանտը հայտնվի աֆղանների ձեռքում, ապա այնտեղ գտնվող ահաբեկիչներն ու նրանց հանցակիցները շուտով կհայտնվեն ազատության մեջ: Վերջերս Հեյգելն այդ խնդիրը Քարզայի հետ քննարկել էր Աֆղանստան կատարած այցի ժամանակ:
Բոլոր բանտերի վերահսկողությունը Աֆղանստանի իշխանություններին հանձնումը ամրագրված է ԱՄՆ-ի և Աֆղանստանի նախագահների համատեղ հայտարարության մեջ: Բարաք Օբաման և Համիդ Քարզայն այդ մասին հայտարարել էին հունվարին՝ Սպիտակ տանը կայացած բանակցություններից հետո:
