Երևանի Վ. Բրյուսովի անվան պետական լեզվաբանական համալսարանի նախկին ռեկտոր Սուրեն Զոլյանը մարտի 15-ի հաղթահավաքում ելույթից հետո ԱԱԾ-ից ծանուցագիր է ստացել: Նույն օրը՝ երեկոյան ժամը 22:00-ին, ԱԱԾ ներկայանալու հեռախոսազանգ է ստացել: Սակայն տարօրինակը, ըստ Սուրեն Զոլյանի, այն է, որ ծանուցագրում բացակայում է, թե ինչ գործի վերաբերյալ են հրավիրում ԱԱԾ:
Ի՞նչ ասել է Բրյուսովի պետական լեզվաբանական համալսարան ՊՈԱԿ-ի վերաբերյալ բացատրություն տալ, կամ Լեզվաբանական համալսարանի վերաբերյալ նյութեր նախապատրաստելու անհրաժեշտությունից ելնելով են հրավիրում՝ նման մեկնաբանությունը նախկին ռեկտորի համար պարզ չէ:
Մարտի 25-ին Սուրեն Զոլյանը ստացել է բացատրություն տալու համար ԱԱԾ ներկայանալու երկրորդ ծանուցագիրը: Առաջին ծանուցագիրը ուշացած է հասել Սուրեն Զոլյանին, այդ պատճառով չի ներկայացել: Իսկ թե որքանով է կապ տեսնում հանրահավաքում իր ելույթի և ծանուցագրեր ստանալու միջև, Սուրեն Զոլյանը թողեց մեր դատողությանը:
Երևանի ավագանու ընտրություններին որպես ավագանի «Բարև, Երևան» դաշինքի ցուցակում ընդգրկվելը, Սուրեն Զոլյանի խոսքով, ոչ այնքան քաղաքականության մեջ մտնել է նշանակում, որքան՝ աջակցել շարժմանը: Սա, ըստ նրա, իրավունքի վերականգնման հարց է. «Տվյալ դեպքում ես ոչ թե հեղափոխությանն եմ միանում, ես կսահմանեի որպես սահմանադրական կարգի վերականգնում, այլ ոչ թե հեղափոխություն»,- նշեց նա:
Իշխանությունը, նրա խոսքով, պետք է լինի օրինական՝ հիմնված հարգանքի և վստահության վրա, այլապես դա օկուպացիոն ռեժիմ է կամ բանդիտական կարգեր, ինչի երկար ձգվելու դեպքում երկրի կործանում կլինի:
Նա նշեց, որ երեկ ստացել է Եվրախորհրդի պառլամենտական ասամբլեայի զեկույցը, որտեղ կա մեկ պարբերություն. թեև անուն նշված չէ, ոչ էլ երկիրն է նշված, բայց ակնհայտ է, որ խոսքն իր մասին է. փորձագետը նկարագրական ձևով նշել է, որ իրեն թույլ չեն տվել մասնակցելու փորձագետների կոմիտեի փետրվարի 22-ի նիստին, և հիմա Եվրախորհրդի ասամբլեան ընդունել է որոշում փորձագետների նշանակման գործընթացների վերաբերյալ:
Սուրեն Զոլյանը հիշեցրեց, որ երբ Վերաքննիչ դատարանում ինքը հրապարակեց նամակից մի հատված, ըստ որի՝ կառավարության անդամը առանց որևէ պատճառի չի թույլատրել իրեն մասնակցել փորձագետների նիստին, ԿԳՆ ներկայացուցիչ Նորայր Հակոբյանն ասաց, որ նման բողոք չի ստացել, որ Զոլյանը «եսիմ ինչ նամակ է կարդում», որը ձեռք է բերել իր կապերի միջոցով:
