Երևանի ավագանու ընտրություններում «Բարգավաճ Հայաստան» կուսակցության ցուցակում ընդգրկվել է նաև նախկին նախագահ Ռոբերտ Քոչարյանի եղբոր աղջիկը՝ Իրինա Քոչարյանը: Վերջինս զբաղեցնում է 42-րդ հորիզոնականը: Ի. Քոչարյանը Ռ. Քոչարյանի մահացած եղբոր՝ Վալերի Քոչարյանի աղջիկն է: Ըստ այսմ՝ կարելի է ենթադրել, որ Ռ. Քոչարյանը մեծ ազդեցություն է ունեցել ավագանու ԲՀԿ թեկնածուների ցուցակը կազմելու վրա: Հիշեցնենք թեկուզ այն, որ ցուցակը գլխավորում է Վարդան Օսկանյանը, ով ԲՀԿ-ում համարվում է նախկին նախագահի ամենամերձավոր մարդը: ԲՀԿ ցուցակի երկրորդ հորիզոնականը զբաղեցնող Գուրգեն Արսենյանը նույնպես համարվում է Քոչարյանի ազդեցության տակ գտնվող գործիչ:
Հիշեցնենք նաև, որ Ռ. Քոչարյանի նախագահության առաջին տարիներին ԲՀԿ ղեկավար Գագիկ Ծառուկյանն իր բիզնեսը զարգացնում էր Վալերի Քոչարյանի հետ միասին, ով համարվում էր Ծառուկյանի բիզնես-հովանավորը: Նրա մահից հետո արդեն Ռ. Քոչարյանն անձամբ իր հովանավորության տակ վերցրեց Ծառուկյանին: ԲՀԿ ստեղծումը նախկին նախագահի քաղաքական ծրագիրն էր, որը օգտագործում է մինչև այժմ:
Ավելացնենք նաև, որ ԲՀԿ ցուցակում ընդգրկված են նաև մարզիկներ: Օրինակ՝ հունահռոմեական ըմբշամարտի օլիմպիական փոխչեմպիոն Արսեն Ջուլֆալակյանը: ԲՀԿ ցուցակում են նաև Երևանի ավագանու կազմում ԲՀԿ խմբակցության ղեկավար Գուրգեն Գասպարյանը և մյուս անդամները: Այդ ցուցակում տեղ են գրավել նաև ԲՀԿ անդամ նախկին մարզպետներ, Երևանի համայնքապետեր և այլ պաշտոնյաներ:
