Սահմանադրագետ Արմեն Մազմանյանը մասնակցում է ԵՊՀ-ում Վենետիկի հանձնաժողովի՝ ՀՀ կուսակցությունների հետ Սահմանադրական բարեփոխումների նախագիծի քննարկմանը։
Քննարկմանը հիմնական առարկությունները վերաբերում էին կայուն մեծամասնության խնդրին, ինչպես նաև երկփուլ ընտրությանը։ Սահմանադրագետը նշեց, որ սկզբունքային անհամաձայնություն ունի կայունության այս մեկնաբանման հետ։
«Այդ մեկնաբանմամբ կայունությունն ինձ համար ասոցացվում է կայուն աղքատության, կայուն չզարգանալու, կայուն արտագաղթի հետ, և ես կարծում եմ՝ մեր երկրին պետք է հակառակը, մեր երկրում պետք է խրախուսվի այդ մեկնաբանմամբ ոչ թե կայունություն, այլ ողջամիտ անկայունություն։ Մինչդեռ այս կոնցեպտը միգուցե միջանկյալ կայունություն ապահովի, բայց այն ավելի երկարատև առումով ճգնաժամածին է։ Եվ ես սկզբունքային անհամաձայնություն ունեմ այս կոնցեպտի հետ»,-ասաց սահմանադրագետը։
Նա նաև նշեց, որ կառավարման ձևը փոխելով իշխանության կենտրոնացման տենդենցը հաղթահարել անհնար է, ուստի պետք է իշխանության կենտրոնացման տենդենցը վերացնել.
«Որևէ քաղաքական կամք չկա դա հաղթահարելու, այդ դեպքում իշխանությունը կկենտրոնանա վարչապետի կամ կուսակցության գրասենյակում։ Եվ ինստիտուտներ փոխելով՝ մենք դա չենք հաղթահարի»,-ասաց Արմեն Մազմանյանը։
