ԱՄՆ-ը Ռուսաստանին համոզում է միանալ Սիրիայի դեմ պատժամիջոցների ռեժիմին: Բացի այդ, Վաշինգտոնը շարունակում է Մոսկվային կոչ անել դադարեցնել զենքի մատակարարումները Սիրիայի կառավարությանը: ITAR-TASS-ի փոխանցմամբ՝ այս մասին հայտարարել է Սիրիայում ԱՄՆ դեսպան Ռոբերտ Ֆորդը, որը Դամասկոսից հետ էր կանչվել անցած տարվա փետրվարին և մինչ օրս աշխատում է Վաշինգտոնում:
ԱՄՆ Կոնգրեսի Ներկայացուցիչների պալատի արտաքին հարցերով կոմիտեում լսումների ժամանակ ունեցած իր ելույթում նա հայտարարել է, որ ԱՄՆ կառավարությունը ծանոթացել է ՌԴ ԱԳՆ հայտարարությանը, որում ասվում է, որ ապստամբները երեքշաբթի քիմիական զենք են կիրառել: «Ցանկանում եմ հայտնել, որ մենք դա հաստատող ապացույցներ չունենք, և որ մենք մեծ թերահավատությամբ ենք վերաբերվում դրան: Այդ հարցով ներկայում ԱՄՆ կառավարությունում մեծ թիմ է աշխատում»,- նշել է դեսպանը:
Ֆորդը չի հերքել, որ ԱՄՆ-ին անհանգստացնում են սիրիական պետության կոլապսի հեռանկարները:
Դիվանագետի խոսքով՝ կառավարական վերահսկողությունից ազատված շրջաններում պետական ինստիտուտները անհետանում են: Նրա խոսքով՝ նման գոտիներում պետական ինստիտուտների լիովին կոլապս թույլ չտալու համար ԱՄՆ-ը ծրագրում է ակտիվացնել համագործակցությունը ընդդիմության կողմից ընտրված «անցումային շրջանի» վարչապետ Հասան Խիտոյի հետ:
