Պարզվում է, որ Ռուսաստանի Ռազմավարական զարգացման ինստիտուտի տնօրեն Անդրանիկ Նիկողոսյանը հայտնի է Ձուկ Անդո մականվամ: Նա իր մականունը վաստակել է վարչապետ Հովիկ Աբրահամյանի բիզնես գործընկերը լինելու արդյունքում: Մասնավորապես հենց նա է Ռուսաստանի դաշնությունում իրացնում Հովիկ Աբրահամյանին պատկանող հայաստանյան ձկնահորերի արտադրանքը: Հենց Նիկողոսյանն է կազմակերպում ձկան արտահանումը և իրացումը Ռուսաստանի դաշնությունում:
«Նրա մականունը հենց Ձուկ Անդո է ոչ թե նրա համար, որ նա լպրծուն է, այլ նրա համար, որ նա հայտնի է Հայաստանում արհեստական հորերում բուծված ձուկը Ռուսաստանում իրացնելու շնորհիվ: Նրա միջոցով է Մոսկվայի բոլոր կետերում բաշխվում այդ ձուկը: Իսկ այդ բիզնեսով, հայտնի է, որ հիմնականում զբաղվում է վարչապետը: Ձուկ Անդոն հանդիսանում է այդ արտադրանքի էքսկլյուզիվ դիստրիբյուտրը Ռուսաստանի դաշնությունում»,- ասաց մեր աղբյուրը՝ նկատելով, որ հենց այդ ծառայությունները վարչապետին մատուցելու արդյունքում է նա 2013 թվականին Հովիկ Աբրահամյանի կողմից արժանացել պատվո ոսկե մեդալի: Ապա նշանակվել է հայ-ռուսական բարեկամական ակումբի նախագահ Հերմինե Նաղդալյանի օգնական, ակումբի քարտուղար ու պարգևատրվել բազմաթիվ մեդալներով՝ տարբեր գերատեսչությունների ղեկավարների կողմից: «Մուկ և Ձուկ բարեկամությունը խոր արմատներ ունի»,- հավելեց մեր զրուցակիցը:
Հիշեցնենք, որ Նիկողոսյանը վերջերս հայկական մամուլի ուշադրության կենտրոնում հայտնվեց այն բանից հետո, երբ հայտարարեց, որ Հայաստանը վաղ թե ուշ պետք է մտնի Ռուսաստանի կազմի մեջ: Նիկողոսյանի այդ հայտարարությունն արժանացավ բուռն քննադատությունների, սակայն նրան պարգևատրած գերատեսչությունները, անձինք, այդ թվում՝ Հովիկ Աբրահամյանը, որևէ կերպով չդատապարտեցին նրա այդ հակասահմանադրական, Հայաստանի ինքնիշխանության դեմ ուղղված հայտարարությունը: Թերևս բիզնես շահերը չվնասելու պատճառով:
