Չինաստանը շարունակում է նոր կղզիների կառուցումը, ինչը թույլ կտա ընդարձակել նրա տարածքը վիճելի Հարավ-Չինական ծովում, հայտնում է vesti.ru-ն: Այդ տվյալները պարունակվում են այս շաբաթ հրապարակված Պենտագոնի զեկույցում:
Փաստաթղթից հետևում է, որ բացի թռիչքուղուց, ինչի շինարարությունը վերջերս ավարտվել է ստորջրյա ժայռերից մեկի վրա, յոթ ձեռակերտ կղզիներից մեկում կա ևս մեկը, որը ներկայումս շինարարության ավարտման փուլում է գտնվում:
Զեկույցի հեղինակների խոսքերով` երկրորդ թռիչքուղու շինարարությունը Պեկինին կօգնի մի քանի անգամ ավելացնել իր ռազմական ներկայությունն այդ շրջանում:
Պենտագոնում համոզված են, որ դա միայն սկիզբն է, քանի որ մյուս կղզիներում էլ են շինարարական աշխատանքներ կատարվում: Նշվում է նաև, որ ծովախորշերից մեկը բավականին մեծ է և կարող է տաղավորել չինական միակ ավիակիրը, որը Չինաստանը 25 միլիոն դոլարով գնել է Ուկրաինայից:
Հուլիսի կեսերին Չինաստանի ԱԳ նախարար Վան Ին հայտարարել է, որ Չինաստանը կդադարեցնի արհեստական կղզիների շինարարությունը: Սակայն, Չինաստանն արդեն հասցրել է ավելացնել իր տարածքը 1.7 հազար հեկտարով: Այսպիսով, 20 ամսում Չինաստանին հաջողվել է կառուցել ավելին, քան տարածաշրջանի մյուս երկրներն միասին 40 տարվա ընթացքում:
