Վրաստանի իշխանությունները ոչ միայն տիրապետում են Վրաստան ռադիոակտիվ նյութեր տեղափոխելու տեղեկությանը, այլեւ կանխել են այդ փորձը: Ըստ Росбалт-ի` այս մասին հայտարարել է Վրաստանի փոխարտգործնախարար Նինո Կալանաձեն: Ն.Կալանաձեն այս թեմային անդրադարձել է Guardian-ում տպագրված հոդվածի առիթով:
Ինչպես տեղեկացրել էր «Առաջին լրատվականը», նոյեմբերի 7-ին Guardian-ը գրել էր, որ Վրաստանում կանխվել է մաքսանենգ ճանապարհով Վրաստան տեղափոխվող 18 գրամ բարձրհարստացված ուրանի վաճառքի փորձը: Արդյունքում ձերբակալվել են երկու հայեր` գործարար եւ ֆիզիկոս, որոնք արդեն իսկ խոստովանական ցուցմունքներ են տվել: Նրանք փորձել են Երեւան-Թբիլիսի գնացքով ուրանն անցկացնել ծխախոտի ստվարաթղթե տուփով: Guardian-ը հայտնել է ձերբակալված երկու հայերի անունները` Սմբատ Տոնոյան եւ Հրանտ Օհանյան, ապա տեղեկացրել, որ նրանց մոտ գտնված ուրանը հարստացված է 89,4%-ով: Guardian-ի փոխանցմամբ, Հայաստանի մատակարարները մեծ քանակությամբ ուրան ունեն:
Նինո Կալանաձեն նշել է, որ Վրաստանը միացել է գլոբալ անվտանգության հարցերին ոչ միայն տեղեկատվության ոլորտում, այլեւ կանխարգելիչ բնույթի համագործակցություն է իրականացնում միջազգային կազմակերպությունների հետ:
