Հացադուլի 11-րդ օրը ՀՀ նախագահի նախկին թեկնածու, «Ժառանգության» առաջնորդ Րաֆֆի Հովհաննիսյանը իրեն լավ է զգում: Վաղ առավոտից նրան են այցելում բազմաթիվ քաղաքացիներ, ովքեր նաև ստորագրում են այն ձևաթղթի տակ, որով պարտավորվում են մասնակցել ապրիլի 9-ին Րաֆֆի Հովհաննիսյանի երդմնակալությանը և ընդունում են նրա հաղթանակը:
Րաֆֆի Հովհաննիսյանին այսօր այցելեց ապրիլի 8-ին 1 միլիոնանոց երթ նախաձեռնած ռեժիսոր Արշակ Զաքարյանը: Նա եկել էր ստորագրելու ինչպես ձևաթղթի տակ, այնպես էլ Րաֆֆի Հովհաննիսյանի հետ քննարկելու երթ անցկացնել-չանցկացնելու իր մտահղացումը:
«Առաջին լրատվական»-ի հետ զրույցում նա ասաց, որ իր կազմակերպած երթի նպատակը ոչ թե ոստիկանների հետ բախվելն է կամ Բաղրամյան 26-ում անկարգություններ հրահրելը, այլ ինքը և երթի մասնակիցները ցանկանում են Սերժ Սարգսյանին ցույց տալ, որ այդքան մարդ դեմ է իր իշխանությանը: Նա հավելեց, որ երթ անցկացնելու որոշումը Րաֆֆի Հովհաննիսյանինն է, և ինքը չի ցանկանում ստվեր գցել ապրիլի 9-ին Ազատության հրապարակում տեղի ունեցող երդմնակալության վրա:
Նշենք, որ, ինչպես միշտ, Ազատության հրապարակում էին նստացույց հայտարարած երիտասարդները: Նրանցից Նարեկ Վարազդատյանը «Առաջին լրատվական»-ի հետ զրույցում ասաց, որ ինքն ամբողջ օրն այնտեղ է և բացակայում է միայն մեկ-երկու ժամով, նույնիսկ գիշերում է այնտեղ:
Երիտասարդն ավարտել է համալսարանը, այժմ դասավանդում է Պուշկինի անվան դպրոցում: Նրա հայտարարած նստացույցի պահանջը Սերժ Սարգսյանին Բաղրամյան 26-ից դուրս հրավիրելն է: «Դա իր հոր դուքանը չէ»,- ասաց նա:
Նա նաև ասաց, որ իրենց են միացել նաև Վանաձորի Մանկավարժական համալսարանի մի խումբ ուսանողներ, ովքեր այնտեղ հերթափոխով նստացույց են անում:
