Ռազմական, շինարարական և այլ կապալառուներն Իրաքում վերջին 10 տարիներին 138 միլիարդ դոլար են աշխատել: Այս մասին գրում է The Financial Times-ը: Հրատարակչության ուսումնասիրության համաձայն՝ պատերազմում և դրան հաջորդող վերականգնողական աշխատանքներում ամերիկյան և այլ արտասահմանյան շինարարները կարողացել են հարստություն դիզել:
10 խոշորագույն ընկերություններ իրար մեջ 72 միլիարդ դոլար են բաժանել: Ամենից շատ վաստակել է KBR ընկերությունը՝ Halliburton-ի նախկին ստորաբաժանումը, որը Ջորջ Բուշի օրոք ղեկավարվում էր փոխնախագահ Դիկ Չեյնիի կողմից: Այն 39,5 միլիարդ դոլարի պատվեր է կատարել:
Երկրորդ և երրորդ տեղերը զբաղեցրել են Քուվեյթի Agility Logistics և Kuwait Petroleum Corporation ընկերությունները, որոնք համապատասխանաբար վաստակել են 7,2 և 63 միլիարդ դոլար:
Ընդհանուր առմամբ՝ ԱՄՆ-ն Իրաքում ավելի շատ մասնավոր կապալառուներ է վարձել, քան որևէ այլ պատերազմում: Այս ընկերությունների աշխատակիցների թիվը գերազանցել է զինվորականների թվին:
Վերջին ամերիկացի զինվորն Իրաքը լքել է 2011-ին, սակայն երկրում տարբեր ընկերությունների 14 հազար աշխատակիցներ են դեռ գտնվում, ներառյալ՝ անվտանգության ուժերի 5,5 հազար զինյալներ:
Հարկ է նշել, որ հատուկ հանձնաժողովը 2011-ին ցույց է տվել, որ Իրաքում կապալառուներն ընդհանուր առմամբ 60 միլիարդ դոլար են ծախսել, որի զգալի մասը՝ պետական միջոցներից:
