Իրանը ծրագրում է հաջորդ իրանական տարում, որը կսկսվի մարտի 21-ին, կառուցել ծանր ականակիր նավ (էսմինեց)՝ ասել է երկրի պաշտպանության նախարարության Արդյունաբերական հետազոտությունների բաժնի ղեկավար Մուհամմադ Էսլամին: Այս մասին հաղորդում է Tasnim գործակալությունը:
«Մենք արդեն անցել ենք էսմինեցի ընդհանուր տեսքի մշակմանը, և աշխատանքն այդ ոլորտում շարունակվում է»- ասել է նա:
Էսլամին պատմել է նաև երկրի այլ նվաճումների մասին՝ նշելով, որ Իրանը ծրագրում է հաջորդ տարի ստեղծել առաջին 500 տոննայանոց սուզանավը և այն ջուրն իջեցնել 2013-ի վերջին:
Նրա խոսքով՝ Իրանը վերջերս է ավարտել շարժիչային նոր համակարգով, մարտական կառավարման և նավիգացիոն կատարելագործված համակարգերով «Ջամարան-2» ականակիր նավի շինարարությունը:
«Ջամարան-2»-ի արտադրությունը արժեցել է 75 մլն դոլար, և մենք ծրագրում ենք արտահանել այդ նավը հարևան երկրներ՝ օգտվելով հայրենական արտադրությունը խթանելու իրավունքից՝ ասել է Իսլամին: Նա նշել է նաև, որ ծրագրում են արտադրել «Ջամարան-3» և «Ջամարան-4» նավեր:
«Հույս ունենք, որ «Ջամարան-3»-ը պատրաստ կլինի մինչև 2013-ի ավարտը, իսկ «Ջամարան-4» -ը՝ 2014-ի ավարտը »,- ընդգծել է նա:
Իրանը «Ջամարան-2» ականակիր նավը Կասպից ծովն է իջեցրել անցած կիրակի: Արարողությանը մասնակցել են երկրի բարձրաստիճան զինվորականները, ինչպես նաև նախագահ Մահմուդ Ահմադինեժադը:
