Մարտի 18-ին Կանադայում ՀՀ դեսպան Արմեն Եգանյանը հանդիպել է Կանադայի Խորհրդարանի Ներկայացուցիչների պալատի արտաքին հարաբերությունների հանձնաժողովի նախագահ Դին Էլիսոնին:
Հանդիպման ընթացքում կողմերը քննարկել են երկկողմ խորհրդարանական հարաբերություններին վերաբերող հարցեր, անդրադարձել են Հայաստանի և Կանադայի միջև առկա տնտեսական կապերին: Այս կապակցությամբ դեսպան Եգանյանը կարևորեց կանադական ներդրումների ծավալները ՀՀ տնտեսությունում: Դեսպանը նաև կարծիք է հայտնել, որ հայ-կանադական առևտրատնտեսական կապերը զարգացնելու համար առկա են մեծ հեռանկարներ, մասնավորապես` հանքարդյունաբերության ու բարձր տեխնոլոգիաների ոլորտներում:
ՀՀ ԱԳՆ մամլո գրասենյակից «Առաջին լրատվական»-ին հայտնում են, որ կողմերը քննարկել են նաև տարածաշրջանային անվտանգությանը վերաբերող հարցեր, որի շրջանակներում ՀՀ դեսպանը ներկայացրեց Լեռնային Ղարաբաղի հակամարտության կարգավորման ուղղությամբ Հայաստանի և միջազգային հանրության կողմից իրականացվող ջանքերը:
Հանդիպման ավարտին դեսպան Եգանյանը շնորհակալություն է հայտնել Կանադայի կողմից Հայոց ցեղասպանության ճանաչման համար` ընդգծելով Թուրքիայի մերժողական քաղաքականության դադարեցման անհրաժեշտությունը:
