Տուրիզմի հայկական ինստիտուտ ընդունվելու հայտ այս տարի դեռ 15 դիմորդ է ներկայացրել, այնինչ նախորդ տարիներին բուհում դիմորդների թիվն անցել է 40-ից: «Առաջին լրատվական»-ի հետ զրույցում այս մասին տեղեկացրեց ինստիտուտի ռեկտոր Ռոբերտ Մինասյանը: «Տարեցտարի դիմորդների թիվը նվազում է, ավելի շատ զանգեր են լինում, հետաքրքրվում են, բայց վճռական որոշում շատերը չեն կայացնում, որոշ երիտասարդներ գնում են սովորելու՝ առանց հասկանալու, թե ինչ մասնագետ են դառնալու»,- մանրամասնեց Ռ.Մինասյանը:
Նա նաև նկատեց, որ մի շարք բուհերում բացվել են տուրիզմի ֆակուլտետներ, այդ թվում՝ պետական բուհերում: Առաջին հայացքից գայթակղիչ է թվում, բայց կարևորը ոչ թե մասնավոր կամ պետական բուհ լինելն է, այլ որակյալ կադրեր տալը և հետագայում նրանց աշխատանքի տեղավորելը: «Բուհի արդյունավետությունը կադրերով է չափվում. մեր բոլոր շրջանավարտները աշխատում են ոլորտում, այդ թվում՝ արտերկրում»,- մանրամասնեց նա:
Ըստ նրա՝ հենց կրթական խնդիրներից է, որ մեզ մոտ տուրիզմը զարգացած չէ, չկա գիտական մոտեցում: «Աշխարհում չկա մի ոլորտ, որը զարգանա առանց գիտության մասնակցության, առավել ևս այդպիսի ոլորտ է զբոսաշրջությունը, և եթե մենք առաջ շարժվենք հիմնվելով գիտության վրա, ապա կկարողանանք զարգացնել ոլորտը, որի շնորհիվ և՛ երկրի կյանքը կփոխվի, և՛ ներդրումները կավելանան, նոր աշխատատեղեր կստեղծվեն»,- շեշտեց նա:
Տուրիզմի հայկական ինստիտուտի ռեկտորի կարծիքով՝ Հայաստանը տուրիզմի համար է ստեղծված, բայց մենք այսօր մեր երկիրը դեռ ճանաչելի դարձնելու խնդիրն ենք փորձում լուծել, այնինչ պետք է Հայաստանի ինքնությունը աշխարհին ցույց տանք: «Պետք է աշխարհին ներկայացնել, որ առաջին «տուրիստը» եղել է Նոյը, որը բարձրացել է Արարատ, իջել այստեղ»,- մանրամասնեց նա: Ըստ նրա՝ պետք է առասպելներ ստեղծել տուրիստների համար՝ օգտվելով նաև Աստվածաշնչից: «Անհրաժեշտ է նոր ապրանք ներկայացնել աշխարհին: Ինձ գիդերի աշխատանքը չի բավարարում. նրանց պատրաստվածությունը, հայրենասիրությունը պետք է այլ լինի, և այս ամենի մեջ մեծ դեր ունի կրթությունը»,- ասում է նա:
Ըստ Ռ.Մինասյանի՝ տուրիզմը ոսկու անձրև է, որից Հայաստանը կարող օգտվել կրթված մասնագետների շնորհիվ:
Մանրամասները՝ տեսանյութում:
