Բրիտանիայի արքայազն Ուիլյամի կինը՝ հղիության հինգերորդ ամսում գտնվող դքսուհի Քեյթը, ցանկանում է տղա ունենալ, իսկ Ուիլյամը՝ աղջիկ: Ինչպես հաղորդում են բրիտանական ԶԼՄ-ները, այս մասին Քեյթն ասել է Իռլանդական գվարդիայի 1-ին վաշտ կատարած այցի ժամանակ. վաշտը գտնվում է Անգլիայի հարավում՝ Հեմփշիր դքսության Օլդերշոթ քաղաքում:
Ուիլյամն ու Քեյթը 1901թ. սկիզբ առած ավանդույթի համաձայն՝ կիրակի օրն անցկացրել են թագավորական գվարդիայի իռլանդացի զինծառայողների հետ՝ տոնելու վերջիններիս ազգային տոնը՝ Սուրբ Պատրիկի օրը: Այս մասին հայտնում է ITAR-TASS-ը:
Նրանք դիտել են ռազմական շքերթը, ապա ընդունելության ժամանակ շփվել զինվորների ու սպաների հետ:
Գվարդիական Լի Ուիլերը լրագրողներին պատմել է Քեյթի հետ իր խոսակցության մասին: «Իհարկե, մենք խոսեցինք նաև երեխայի մասին: Ես նրան հարցրի՝ գիտի՞ արդյոք երեխայի սեռը: Նա պատասխանեց՝ դեռ ոչ, և ասաց՝ ես կցանկանայի, որ տղա ծնվեր, իսկ Ուիլյամը աղջիկ է ցանկանում»:
Քեյթի ու Ուիլյամի երեխան կգրավի երրորդ տեղը գահի ժառանգման հերթականության մեջ ու կդառնա թագավոր կամ թագուհի:
Մոտ ապագայում Բրիտանիայի կառավարությունը մտադիր է օրենք ընդունել, որը գահի ժառանգման հարցում կհավասարեցնի կանանց ու տղամարդկանց իրավունքները: Մինչ այժմ այդ հարցում առավելությունը վերապահված էր տղամարդկանց:
