Գերմանիայի կանցլեր Անգելա Մերկելը կոչ է արել սիրիական ընդդիմությանը զենքի մատակարարումների արգելքի կասեցման հարցում զգուշավորություն ցուցաբերել՝ նշելով, որ այդ քայլը կարող է Ռուսաստանի և Իրանի կողմից պատասխան գործողությունների պատճառ դառնալ: Այս մասին հայտնում է Reuters գործակալությունը:
Ինչպես հայտնի է, Սիրիա զենքի մատակարարումների ԵՄ էմբարգոյի վերացման օգտին են հանդես գալիս Մեծ Բրիտանիան և Ֆրանսիան:
Բրյուսելում մամլո ասուլիսի ժամանակ Մերկելը նշել է, որ այդ հարցում Ֆրանսիայի և Մեծ Բրիտանիայի ձգտումը 27 անդամ ունեցող եվրոպական բլոկի մյուս 25 անդամ երկրների համար պարտադիր ցուցում չէ:
«Մյուս երկրների ներկայացուցիչները նշել են, այդպես եմ կարծում նաև ես, որ հիմնավորված է այն փաստը, թե Իրանն ու Ռուսաստանը միայն ազդանշանի են սպասում՝ սկսելու զենքի արտահանումը (Սիրիայի իշխանություններին-1in.am)»,- հայտարարել է Մերկելը:
Հիշեցնենք, որ երեկ Գերմանիայի արտգործնախարար Գիդո Վեսթերվելլեն հայտարարել էր, որ Գերմանիան պատրաստ է քննարկել էմբարգոյի վերացման հարցը, եթե դա պնդեն իր ԵՄ գործընկերները:
ԵՄ խորհրդի ղեկավար Հերման վան Ռոմպեյը երեկ հայտարարել էր, որ ԵՄ 27 անդամ երկրների առաջնորդները արտգործնախարարներին հանձնարարել են մարտի 22-23-ին սիրիական հարցի քննարկմանը նվիրված Դուբլինում կայանալիք հանդիպմանը մշակել այդ խնդրի շուրջ միասնական դիրքորոշում, և հնարավոր է՝ ընդունեն զենքի էմբարգոյի վերացման որոշում:
