Ադրբեջանական Salam News լրատվական գործակալության փոխանցմամբ, Ադրբեջանի նախագահ Իլհամ Ալիևն այսօր ընդունել է Թուրքիայի ցամաքային զորքերի հրամանատար, բանակի գեներալ Էրդալ Ջեյլանօղլուին:
Հանդիպման ժամանակ Ալիևը հայտարարել է, որ Թուրքիան ու Ադրբեջանը արդյունավետ համագործակցում են ռազմական ոլորտում: Նա նաև վստահություն է հայտնել, որ Ջեյլանօղլուի ադրբեջանական այցը կծառայի թուրք-ադրբեջանական ռազմական համագործակցության հետագա զարգացմանը:
Թուրք գեներալն, իր հերթին, նշել է, որ թուրք-ադրբեջանական կապերը հաջողությամբ զարգանում են տարբեր ոլորտներում, այդ թվում` ռազմական: Ջեյլանօղլուն նույնպես վստահություն է հայտնել, որ հետագայում է՛լ ավելի կընդլայնվեն երկկողմանի հարաբերությունները:
Հիշեցնենք, որ Ջեյլանօղլուին երեկ ընդունել է Ադրբեջանի պաշտպանության նախարար Սաֆար Աբիևը: Հանդիպման ժամանակ կողմերը քննարկել են երկու երկրների միջև ռազմավարական համագործակցության հեռանկարները:
Հանդիպմանը ներկա են եղել նաև Ադրբեջանում Թուրքիայի արտակարգ և լիազոր դեսպան Հուլուսի Քըլըչը և Ադրբեջանում Թուրքիայի ռազմական կցորդ, բրիգադի գեներալ Օզհան Այաշը:
