Եվրախորհրդի նախագահ Հերման վան Ռոմպեյը չի բացառել, որ ԵՄ երկրները Սիրիայի ընդդիմությանը զենք մատակարարելու արգելքը հանելու հարցի շուրջ համաձայնության կգան:
«Մենք քննարկումներ ենք անցկացնում: Նորմալ է, երբ երկրները, նախարարները, առաջնորդներն արտահայտում են իրենց կարծիքը: Ես Լիբիան եմ հիշում: Մենք սկսեցիք քննարկել, թե ինչպես գործել Լիբիայում և արդյունքում ընդհանուր հայտարարի եկանք»,- ասել նա՝ պատասխանելով լրագրողների հարցերին: Վան Ռոմպեյը տեղեկացրել է, որ ԵՄ 27 երկրների ղեկավարները կարգադրել են ԱԳ նախարարներին հաջորդ շաբաթ Դուբլինում առաջնահերթ կերպով քննարկել Սիրիայի իրադրությունը և «զենքի մատակարարման արգելքը հանելու հնարավորությունը», ինչպես նաև՝ այս հարցի շուրջ մեկ ընդհանուր դիրքորոշում մշակել:
Ինչպես հայտնի է, զենքի մատակարարման արգելքը հանելու կողմ են հանդես գալիս Բրիտանիան և Ֆրանսիան: ԵՄ խորհուրդը որոշում է կայացրել մասամբ հետաձգել ռազմական մատակարարումների արգելքը՝ սիրիացի ապստամբներին օգնություն ցուցաբերելու համար՝ թույլատրելով ոչ ռազմական զրահապատ մեքենաների, նավիգացիոն և կապի միջոցների, ինչպես նաև գիշերային ժամերին տեսանելիությունն ապահովող սարքավորումների մատակարարումը:
Այս հարցի շուրջ տարաձայնություններն առաջացել էր այն ժամանակ, երբ Բրիտանիայի վարչապետ Դևիդ Քեմերոնը հայտարարել էր, որ Բրիտանիան կարող է միակողմանի դուրս գալ այս համաձայնագրից, եթե ԵՄ-ն այն չեղյալ չհամարի: Ավելի ուշ Բրիտանիային միացել էին Ֆրանսիան և Գերմանիան:
