Բրյուսովի անվան լեզվաբանական համալսարանի նախկին ռեկտոր Սուրեն Զոլյանը այսօր Ազատության հրապարակում հանրահավաքին ասաց, որ ինքն այստեղ է՝ իմ համերաշխությունը և հիացմունքը Րաֆֆի Հովհաննիսյանին հայտնելու համար, քանի որ այսօր նա առաջամարտիկ է բոլորի համար, պաշտպանում է մեր բոլորի շահերը.
«Այստեղ եմ, որ պաշտպանեմ մեր շահերը: Ամենամեծ իրավունքն է ունենալ օրինական իշխանություն: Րաֆֆին ընտրվել է որպես նախագահ: Հիմա ուշ է, ով պարտվել է, ավելի լավ է պատրաստվի հաջորդ ընտրություներին»,-ասաց Սուրեն Զոլյանը:
Նա հայտարարեց, որ ինքը քվեարկել է Անդրիաս Ղուկասյանի օգտին, բայց դա կապ չունի: Նրա խոսքով, այն մարդիկ, ովքեր կեղծել են ընտրությունը, նրանք ևս մեր մասնիկն են և չպետք է հրաժարվենք նրանցից.
«Առաջարկը, որի շուրջ կարելի է բանակցել, մենք համատեղ հանձնաժողով պետք է ստեղծենք. 2000 պարկը հաշվելն ի՞նչ մի դժվար բան է: Ի՞նչ դժվար բան է հանձնաժողով ստեղծել և պարզել, թե մեկ ամիս առաջ ի՞նչ է եղել»,-ասաց Սուրեն Զոլյանը:
Նա նաև ասաց, որ նրանք, ովքեր չմասնակցեցին ընտրություններին, պատրաստվում են ավագանու ընտրություններին.
«Ի՞նչն է փոխվել: Ոչի՛նչ չի փոխվել, ընտրակեղծիքների մեքենան չի փոխվել, ուրեմն պետք չէ մոռանալ ամենագլխավոր նպատակի մասին՝ հաղթած Րաֆֆի Հովհաննիսյանի իրավունքի հաստատումը: Լուծելով այդ հարցը՝ նոր կարելի է գնալ այլ ընտրությունների»,-իր ելույթում նշեց Սուրեն Զոլյանը:
Ամենամեծ հանցագործները, ըստ նրա, այն դատավորներն ու իրավաբաններն են, որոնք գործում են պետության և օրենքի դեմ, քանի որ չի կարող լինել անօրինական իշխանություն, իշխանությունը պատկանել է և պատկանում է ժողովրդին:
«Հարգելի՛ բարեկամներ, Րաֆֆին ճիշտ է գործում, բայց Րաֆֆին անզոր է ազատել մեզ, եթե ինքներս չկարողանանք ինքնակազմակերպվել»,-եզրափակել է խոսքը Սուրեն Զոլյանը:
