Դյուսելդորֆի միջազգային և Քյոլն-Բոնն օդանավակայանների աշխատանքը խափանվել է անվտանգության ծառայությունների աշխատակիցների գործադուլի պատճառով: Գործադուլը, որը սկսվել է տեղի ժամանակով ժամը 04:00-ին (Երևանի ժամանակով՝ ժամը 07:00-ին), և որը կշարունակվի մինչև կեսգիշեր, անցկացնում է Verdi արհմիությունը: Այս մասին հայտնում է ITAR-TASS-ը:
Ինչպես հաղորդել է Դյուսելդորֆի օդանավակայանի ներկայացուցիչը, այսօր ծրագրված 609 չվերթներից ավելի քան 220-ը չեղյալ են հայտարարվել: Քյոլն-Բոնն օդանավակայանում չեղյալ են հայտարարվել այսօր ծրագրված 210 չվերթներից շուրջ 80-ը: Վերահսկիչ կետերի մոտ երկար հերթեր են գոյացել: Ուղևորներին խորհուրդ է տրվում նախապես տեղեկանալ չվերթների հնարավոր հետաձգումների կամ կասեցումների մասին:
Երկու օդանավակայաններում այսօր աշխատանքի դուրս չեն եկել ընդհանուր առմամբ 250 աշխատակիցներ:
Արհմիության և գործատու ընկերությունների միջև սակագնային համաձայնագրերի վերանայման շուրջ բանակցությունների հերթական փուլը կանցկացվի մարտի 18-ին: Մինչ այդ արհմիությունը որոշել է ուժեղացնել ճնշումը՝ պահանջելով աշխատողների աշխատավարձը մեկ ժամի համար բարձրացնել 2.50-3.64 եվրոյով, մինչդեռ գործատուները առաջարկում են բարձրացնել ընդամենը 40 ցենտով:
