Շատ հանգիստ կարող էին երկու օրվա ընթացքում բացել պարկերը և պարզել, թե ինչ է տեղի ունեցել իրականում: Սահմանադրական դատարանի վճիռը լսելուց հետո լրագրողների հետ ճեպազրույցի ընթացքում նման հայտարարություն արեց «Ժառանգություն» կուսակցության պատգամավոր Զարուհի Փոստանջյան։ «Տեղի է ունեցել ուղղակի գողություն, որն էլ այսօր հաստատեց Սահմանադրական դատարանը: Սերժ Սարգսյանը գողացել է Հայաստանի Հանրապետության քաղաքացու ձայները», -ասաց նա:
Լրագրողների այն դիտարկմանը, թե ինչու են Րաֆֆի Հովհաննիսյանի վստահված անձինք ստորագրել արձանագրությունների տակ և հատուկ կարծիքներ չեն կազմել, Փոստանջյանը պատասխանեց. «Րաֆֆի Հովհաննիսյանի վստահված անձինք աշխատել են ու կարողացել են պահել 540.000 ձայն: Չխոսել համատարած բռնության ու խոսել միայն մեկ ընտրատեղամասի մասին՝ մեկ անգամ ևս մատնանշում է, որ իրավապահ մարմինները, այս գործընթացի կազմակերպիչները դրսևորել են բացարձակ անգործություն»։
Հիշեցնենք, որ ՀՀ Սահմանադրական դատարանն ուժի մեջ թողեց փետրվարի 18-ին կայացած նախագահի ընտրությունների արդյունքները ճանաչելու մասին Կենտրոնական ընտրական հանձնաժողովի որոշումը: Սահմանադրական դատարանի որոշմամբ՝ անվավեր համարվեցին միայն Արտաշատի թիվ 17/05 ընտրատեղամասի ընտրությունների արդյունքները, ինչն էլ ընտրությունների ընդհանուր արդյունքի վրա, բնականաբար, ոչ մի ազդեցություն չունեցավ:
