Կոտայքի մարզի ընդհանուր իրավասության դատարանը Վաղինակ Մկրտչյանի նախագահությամբ հետախուզում է հայտարարել սուտ մատնություն կատարելու համար՝ ՀՀ քրեական օրենսգրքի 333 հոդվածի 2-րդ մասի 1-ին կետով մեղադրվող 19-ամյա աղջկա՝ Լ. Մ.-ի նկատմամբ:
Ըստ մեղադրանքի՝ նա 2014 թվականի հունիսի 30-ին տանը իր չգիշերելու հանգամանքն ընտանիքի անդամների մոտ արդարացնելու նպատակով, գիտակցելով, որ իր տրամադրած տեղեկությունը կեղծ է, 2014 թվականի հուլիսի 6-ին, նախազգուշացված լինելով սուտ մատնության համար նախատեսված քրեական պատասխանատվության մասին, հաղորդում է տվել, թե հունիսի 30-ին, ժամը 13-ի սահմաններում Աբովյանի քոլեջներից մեկի մոտից մարզի բնակիչ Շ.-ն ավտոմեքենայով իրեն առևանգել, տարել է Երևան-Սևան ավտոճանապարհի 20 կմ հատվածում գտնվող քարե տնակ, որտեղ իր կամքին հակառակ իր հետ ունեցել է սեռական հարաբերություն:
Ամբաստանյալ Լ. Մ.-ն, պատշաճ ծանուցված լինելով, առանց հարգելի պատճառների առկայության մասին դատարանին տեղյակ պահելու՝ չի ներկայացել 2015թվականի հունիսի 8-ին և հունիսի 22-ին նշանակված դատական նիստերին:
Դատարանը կայացրել է Լ. Մ.-ին բերման ենթարկելու որոշում:
2015 թվականի հուլիսի 17-ին դատարան է ստացվել ոստիկանության գրությունը այն մասին, որ 19-ամյա աղջիկը՝ Լ. Մ.-ն, շուրջ երկու ամիս բացակայում է իր բնակության վայրից, նրա գտնվելու վայրի մասին տեղեկություն չկա:
Հուլիսի 20-ի դատական նիստի ժամանակ մեղադրողը միջնորդել է ամբաստանյալ Լ. Մ.-ի նկատմամբ հայտարարել հետախուզում՝ նկատի ունենալով այն հանգամանքը, որ նա փաստացի թաքնվում է վարույթն իրականացնող մարմնից, նրա գտնվելու վայրը հայտնի չէ:
Դատարանը բավարարել է մեղադրողի միջնորդությունը և հայտարարել է հետախուզում՝ մինչև Լ. Մ.-ի հայտնաբերվելը կասեցնելով գործի վարույթը:
