ԱՄՆ նախագահ Բարաք Օբամայից հայկական համայնքի ակնկալիքները մեծ էին, և շատերը նրան ընտրել էին՝ համոզված լինելով, որ վերջինս իր ապրիլքսանչորսյան ուղերձում կարտասանի Ցեղասպանություն բառը: Մեկ անգամ Օբաման արդեն չի կատարել հայկական համայնքի ակնկալիքը, և ինչպես հուշում են հանգամանքները, այս տարի ևս Օբաման չի արտասանի Ցեղասպանություն բառը:
Այդուամենայնիվ, ՀՅԴ բյուրոյի Հայ դատի և քաղաքական հարցերով գրասենյակի պատասխանատու Կիրո Մանոյանի կարծիքով, պետք չէ վերջնականապես հիասթափվել. «Վերջնական չէ այն, որ քաղաքականության մեջ կեցվածքները չեն փոխվում, և որպեսզի փոխվեն, պետք է անընդհատ հետապնդենք այդ հարցերը»:
«Առաջին լրատվական»-ի հետ զրույցում Մանոյանը տեղեկացրեց, որ հենց այդ նպատակով երկու օրից Կալիֆոռնիայում ցույց են անելու Օբամայի այցելության առիթով: Մանոյանը նշեց, որ չգիտի, թե արդյոք կփոխի՞ Օբաման այս տարի իր կեցվածքը, սակայն, ըստ նրա, ճիշտ չէ հրաժարվել պայքարից միայն նրա համար, որ քաղաքականության մեջ խոստումները միշտ չէ, որ հարգվում են, քանզի այդ դեպքում ընդհանրապես անիմաստ է քաղաքականությամբ զբաղվելը:
Հարցին՝ արդյո՞ք հայկական համայնքը կհիասթափվի և հաջորդ ընտրություններին էլ չի աջակցի Օբամային, Մանոյանը պատասխանեց. «Կարծում եմ, վերջնականապես ասել, թե չի աջակցի, ճիշտ չէ, որովհետև պետք է նայել՝ այլընտրանքն ով է, բայց որ այս և այլ խոստումներ չկատարելը իրենց բացասական հետևանքը կունենան հայ համայնքի կողմից Օբամայի հանդեպ համակրանքի չափի վրա, պարզ է»: