Եվրամիության և ոչ մի երկիր մինչ օրս չի առաջարկել զենք մատակարարել Սիրիային,- հայտարարել է ԵՄ դիվանագիտության ղեկավար Քեթրին Էշթոնը:
Նրա խոսքերով՝ Սիրիայի հարցի շուրջ քննարկումներում անդամ պետություններից ոչ մեկը չի առաջարկել կասեցնել զենքի մատակարարումների էմբարգոն և սկսել Սիրիա զենք մատակարարել: Այս մասին Էշթոնը հայտնել է՝ պատասխանելով Եվրախորհրդարանի պատգամավորնրի հարցերին:
Արտաքին հարցերով ԵՄ խորհուրդը փետրվարի վերջին որոշում ընդունեց սիրիացի ապստամբներին օգնություն ցուցաբերելու համար զենքի մատակարարումների էմբարգոյի մասամբ կասեցման մասին՝ թույլատրելով ոչ մարտական զրահամեքենաների, նավիգացիոն և կապի միջոցների, ինչպես նաև գիշերային տեսանելիության սարքերի մատակարարումները:
Ավելի վաղ հաղորդվել էր, որ ԵՄ անդամ 27 երկրների արտգործնախարարների հանդիպմանը Մեծ Բրտանիան և Ֆրանսիան առաջարկել են մասամբ հանել արգելքը, սակայն աջակցություն չեն ստացել մյուս երկրների կողմից: Այս մասին հայտնում է RIA Novosti-ն:
ԱՄՆ պետդեպի պաշտոնական ներկայացուցիչ Վիկտորյա Նուլանդն էլ իր հերթին հայտարարել է, որ ԱՄՆ-ն և Ռուսաստանը միայն օգնում են սիրիական ընդդիմությանը կողմնորոշվել, թե կոնկրետ կառավարության որ ներկայացուցիչների հետ նա կարող է երկխոսություն ունենալ Սիրիայի ապագայի մասին:
Ավելի վաղ Ֆրանսիայի արտգործնախարար Լորան Ֆաբիուսը հայտնել էր, որ Փարիզն ու Վաշինգտոնը խորհրդակցություններ են անցկացնում Մոսկվայի հետ՝ որոշելու համար սիրիական իշխանությունների այն ներկայացուցիչներին, որոնց հետ կարելի է Սիրիայի ապագայի մասին երկխոսություն սկսել:
Նուլանդի խոսքով՝ իրենք չեն պատրաստվում նման բան որոշել, քանի որ դա իրենց սեփական ցուցակը չէ, և դա պետք է անեն միմիայն սիրիացիները:
