Սիրիայի ապստամբները հարձակում են գործել երկրի նախագահ Բաշար Ալ-Ասադի եղբոր՝ Մահերի հրամանատարության տակ գտնվող Չորրորդ մեխանիզացված դիվիզիայի վրա: Այս մասին հաղորդում է Reuters-ը:
Դիվիզիան տեղակայված է Դամասկոսի և Գոլանի բարձունքի միջև գտնվող Խան Շեյխ գյուղում: Այնտեղ են տեղակայված նաև Հանրապետական գվարդիայի էլիտար ստորաբաժանումները, որոնք նույնպես հարձակման են ենթարկվում ապստամբների կողմից:
Ականատեսների խոսքերով՝ կառավարական զորքերը կրակ են բացել ընդդիմադիրների վրա՝ փորձելով խուսափել շրջափակումից: Տեղի բնակիչները պնդում են, որ կրակոցների հաճախականությունը կազմում է րոպեում 20 կրակոց:
Իրենք՝ ապստամբները, գործակալությանը հայտնել են, որ գործողությանը մասնակցում է ավելի քան 1000 զինվոր: Իրենց գլխավոր խնդիրն է ոչ միայն ջախջախել հակառակորդին, այլ Իսրայելի սահմանի մոտ գտնվող սիրիական զորքերին կտրել Դամասկոսից:
Գրեթե միաժամանակ զինված ջոկատները հարձակում են սկսել Դամասկոսի հյուսիս-արևելքում՝ Ջոուբար և Բարզա թաղամասերում, հաղորդում է Associated Press-ը: Այդ թաղամասերը հարում են քաղաքի կենտրոնին, ուստի դրանց վերահսկողությունը մեծ կարևորություն ունի երկու կողմերի համար էլ:
Մայրաքաղաքի հարավ-արևմուտքում և հյուսիս-արևելքում բախումների հետևանքով զոհերի մասին ոչինչ չի հաղորդվում:
