Հայաստանում ամենակոռումպացված ոլորտներն են դատական համակարգը, պետական ծառայությունը և առողջապահության նախարարությունը: Այս մասին այսօր լրագրողների հետ զրույցում հայտարարեց «Թրանսփարենսի ինթերնեյշընլ» հակակոռուպցիոն կենտրոնի տնօրեն Վարուժան Հոկտանյանը:
ՀՀ արդարադատության փոխնախարար, Հակակոռուպցիոն ծրագրերի ազգային համակարգող Սուրեն Քրմոյանն էլ հակադարձեց, թե՝ կառավարությունն ակտիվորեն պայքարում է կոռուպցիայի դեմ, և երեկվա կառավարության հակակոռուպցիոն խորհրդի նիստը և հրապարակված ռազմավարությունը վկայում են այդ մասին:
Քրմոյանի խոսքով՝ անհրաժեշտ է կոռուպցիայի դեմ համակողմանի պայքար: Կոռուպցիայի դեմ չպետք է պայքարի միայն կառավարությունը, այլ ցանկացած քաղաքացի և բիզնես-ոլորտի ներկայացուցիչ: «Մեր նպատակն է կոռուպցիայի դեմ պայքարում ներգրավել բիզնեսի ներկայացուցիչներին, նրանք չպետք է մասնակցեն կոռուպցիոն սխեմաներին, խնդիրները չպետք է լուծեն կաշառքի ու հովանավորչության միջոցով: Ընկերությունները պետք է ներքին ծրագերր մշակեն՝ իրենց ներսում կոռուպցիան բացառելու համար»,- ասաց Քրմոյանը՝ հավելելով, որ այնպիսի քայլեր պետք է ձեռնարկվեն, որ հասարակությունը ինքը տեսնի, որ կոռուպցիա չկա կամ գոնե նվազագույնի է հասել:
Տնտեսագետ, փորձագետ Արտակ Մանուկյանի խոսքով՝ այո, կառավարությունը պետք է պայքարի կոռուպցիայի դեմ, բայց իրենք դրա համար բավական ժամանակ ունեցել են, սակայն մենք որևէ գործուն քայլ չենք տեսել: «Իրենք բավականաչափ ժամանակ ունեցել են, և ոչինչ չի փոխվել, ոչ մի խոշորի գլխից չի բռնվել: Ու եթե իրենք քաղաքական կամք ունենային, ապա գոնե որևէ դեպքով գործնական քայլերի կգնային ու ցույց կտային, որ իրենք պատրաստակամ են վերացնելու կոռուպցիան: Այդ առումով ես՝ որպես քաղաքացի, պեսիմիզմով եմ լցված հակակոռուպցիոն խորհրդի գործունեության հանդեպ»,- ասաց Մանուկյանը:
Առավել մանրամասն՝ տեսանյութում։
