Մինչ 115 կարդինալները պատրաստվում են կաթոլիկների նոր հովվապետի ընտրությանը, Վատիկանը առերեսվել է նոր սկանդալի: Պատճառը տեղեկություններն են այն մասին, որ Վատիկանի առանցքային դեպարտամենտներից մեկը Հռոմում շենքի կեսը հատկացնում է գեյերի համար իտալական ամենամեծ սաունային:
Պատմական պալատը Ավետարանի քարոզման կոնգրեգացիայի կենտրոնակայանն է, որը հիմնադրվել է 1622 թվականին և պատասխանատու է միսիոներական գործունեության համար: Շենքը հանդիսանում է 15 հոգևորականների կացարան:
Շենքում տեղակայված է նաև Europa Multiclub Sauna and Gym-ը, որն իր կայքում ներկայացվում է որպես «Իտալիայում գեյերի թիվ մեկ սաունա»:
2008 թվականին շենքում 20 սենյակներ ձեռք բերելու համար Վատիկանը ուռճացված գին է վճարել՝ գրում է La Repubblica թերթը:
2008 թվականի մայիսի 30-ին այդ սենյակները անշարժ գույքի շուկայում աշխատող ընկերության կողմից գնվել են 9 միլիոն եվրոյով, նույն օրն ավելի ուշ վաճառվել են Վատիկանին 20 մլն եվրոյով:
Վատիկանը հրաժարվել է մեկնաբանություններից:
