ԱԺ ՀՀԿ խմբակցության անդամ, ԱԺ պաշտպանության, ներքին գործերի և ազգային անվտանգության մշտական հանձնաժողովի նախագահ Կորյուն Նահապետյանի համար անակնկալ էր հացադուլի գնալու Րաֆֆի Հովհաննիսյանի քայլը՝ չնայած որ մեկ անգամ արդեն նա նման քայլ կատարել էր՝ բոլորովին այլ առիթով ու պահանջներով։ Այնուամենայնիվ, պատգամավորը հույս ունի, որ նախագահի նախկին թեկնածուն հետ կկանգնի իր այդ քայլից: «Կարծում եմ՝ Րաֆֆի Հովհաննիսյանը դեռ կունենա այնքան քաղաքացիական խոհեմություն, որ ճիշտ կգնահատի իրավիճակը, և սրանից ելնելով՝ քայլեր կիրականացնի: Կարծում եմ, բոլոր քաղաքական ուժերը, որ այսօր որոշակի դերակատարում ունեն, պետք է մտահոգված լինեն»,- ասել է Կորյուն Նահապետյանը՝ Հանրային հեռուստաընկերության «Հարցազրույց» հաղորդման եթերում:
Պատգամավորը պատահական չի համարում, որ հանրապետության նախագահը պաշտոնական հրավեր է ուղարկել Րաֆֆի Հովհաննիսյանին, իսկ վերջինիս արձագանքը համարում է մերժում. «Ստեղծված իրավիճակուն միակ հնարավոր լուծումը պետք է լինի երկխոսությունը, իսկ երկխոսությունից առաջ նախապայմաններ թելադրել և ասել, որ պետք է նախագահը ներկայանա հրապարակ, անընդունելի է»: Կորյուն Նահապետյանը հույս ունի, որ Րաֆֆի Հովհաննիսյանը կամուրջները չի այրի, բայց տեսնում է դրա նշանները. «Նրա շուրջ կան հավաքված որոշակի մարդիկ, որ ամենևին էլ հակված չեն մեր երկրում համերաշխություն ստեղծել, կլինեն ուժեր, որ կցանկանան ստեղծված իրավիճակից հօգուտ իրենց լուծումներ գտնել: Բոլորը չէ, որ հակված են քաղաքական համերաշխության և հանդուրժողականության մեր երկրում։ Ցավոք, եղել են նման բաներ՝ ողբերգական ավարտով: Հանդիպման վայրը կարող է ցանկացած տեղ ընտրվել, բայց ամենանորմալ վայրն է առաջարկել ՀՀ նախագահը: Ամենակարևորը ոչ թե վայրն է, այլ հարցերի այն օրակարգը, որ պետք է քննարկվի»: Կորյուն Նահապետյանի խոսքերով, Րաֆֆի Հովհաննիսյանն ուզում է հանդիպել Ազատության հրապարակում, որպեսզի իր միտինգային ազդեցությունը պահպանի:
Գալով Րաֆֆի Հովհաննիսյանի՝ Սերժ Սարգսյանին արած նախորդ առաջարկներին, հանրապետական պատգամավորն ասել է. «Այն, ինչ առաջարկել է Րաֆֆի Հովհաննիսյանը, դժվար թե ինչ-որ համաձայնության գանք»: Կորյուն Նահապետյանը կարևորել է նաև համագործակցությունը խորհրդարանի մակարդակով:
Պատգամավորն, անդրադառնալով Երևանի ավագանու ընտրություններին, ասել է. «Մեր քաղաքական թիմն ամեն ինչ անելու է, որ ավագանու ընտրությունները նույնպես անցնեն օրենքի տառին համապատասխան: Այս ըտրություններում ներկայացնելու ենք այնպիսի ցուցակ, որը, կարծում եմ, կարժանանա մեր քաղաքացիների վստահությանը»: Կորյուն Նահապետյանը ցանկալի է համարել, որ ընդդիմադիր դաշտում կայանալիք համախմբումը լինի գաղափարական հենքի վրա:
