«Ակնհայտ է, որ այս համակարգը հետզհետե փորձում է վերականգնել խորհրդային ժամանակներին բնորոշ մեխանիզմները, մեթոդները, անգամ մարդիկ են այն աստիճանի հին, որ կառավարում են այս համակարգը»,- «Առաջին լրատվական»-ի հետ զրույցում ասաց ՀԽ փոխնախագահ Վարուժան Ավետիսյանը՝ անդրադառնալով սահմանադրական փոփոխություններին:
Նա շեշտեց, որ եթե մենք ազգովին չփորձենք դուրս գալ այս աղետալի վիճակից, կհայտնվեք այնպիսի փոսում, որից դուրս գալը գերմարդկային ճիգեր կպահանջի. «Փոփոխությունները կյանքի կոչելուց հետո կխորանան ռազմավարական հարցերի շուրջ աճուրդ-վաճառքային տրամաբանությամբ գործողությունները»,-ասաց Վ.Ավետիսյանը:
Նրա կարծիքով՝ առաջարկվող նախագիծը պարունակում է Մարդու իրավունքների և հիմնարար ազատությունների ոտնահարման, ինքնիշխանության հանձնման, ազգային շահերի վաճառքի հնարավորություններ: «Անգամ լծակներ՝ մարդ սպանելու իր քաղաքացիական և մարդկային դիրքորոշումը հայտնելու դիմաց»,- մանրամասնեց ՀԽ փոխնախագահը:
Ըստ նրա՝ այս համակարգով փորձում են ստեղծել համակենտրոնացման ճամբար ժողովրդական դեկորացիաների ծածկույթի տակ, բայց դրանից էությունը չի փոխվելու՝ «հին և բարի ժամանակներ՝ կենտկոմի քարտուղարի գլխավորությամբ»:
Վարուժան Ավետիսյանը, անդրադառնալով այս պահին սահմանադրական փոփոխությունների շուրջ թե՛ խորհրդարանական և թե՛ արտախորհրդարանական ուժերի պասիվությանը, նշեց, որ դա պայմանավորված է արձակուրդային տրամադրություններով, ինչը իշխանությունները հաշվարկել էին: Նրա կարծիքով՝ սա այն հարցը չէ, որում պետք է հապաղել, անհրաժեշտ է լայն կոնսոլիդացիա քաղաքական ուժերի և շահագրգիռ կուսակցությունների միջև, հատկապես կարևորում է երիտասարդների ավյունը. «Այդ նպատակին հասնելու համար Հիմնադիր խորհրդարանի քարտուղարությունը բոլոր առողջ ուժերին ու անհատներին առաջարկում է ձևավորել հարթակ և այնտեղ կազմակերպվող քննարկումների միջոցով մշակել միասնական դիրքորոշում և գործողությունների ծրագիր»,-մանրամասնեց նա:
Անդրադառնալով այն հայտարարությանը, թե Սերժ Սարգսյանը չի հավակնում ԱԺ նախագահի պաշտոնին, և իր շահը ո՞րն է սահմանադրական փոփոխություններում, Վարուժան Ավետիսյանն ասաց. «Մի ոտքը գերեզմանում, զառամյալ Բրեժնևի ինչի՞ն էր պետք այդ ամենը»:
Մանրամասները՝ տեսանյութում:
