Հացադուլ հայտարարած «Ժառանգության» առաջնորդ Րաֆֆի Հովհաննիսյանն այսօր Ազատության հրապարակում հրավիրեց մամուլի ասուլիս: Նա հենց սկզբում շնորհակալություն հայտնեց բոլորի զորակցոթյան համար, հետո ներկայացրեց մի շարք եզրույթներ, որոնք այլևս չի օգտագործելու. «Այսօր վերջին անգամ մի երկու եզր պիտի օգտագործեմ, առաջինը՝ սա հաղթական տոնակատարություն է, որը ճշմարտության ճանապարհն է, ոչ հայաստանցի, ոչ նախկին պաշտոնյա, որ էլ օտար նախագահներ մեր հաղթանակը չեն տանելու, երկրորդը՝ ես չեմ ուզում հրապարակում տեսնել ոչ մի արցունք, ոչ մի տխուր դեմք, մենք այստեղ հաղթել ենք»:
Րաֆֆի Հովհաննիսյանն ասաց նաև, որ երբ խոսում է ապրիլի 9-ին կեղծված հնարավոր երդման և պղծված Ավետարանի մասին, հույս ունի, որ Ս. Սարգսյանը և Գարեգին Երկրորդը թույլ չեն տա, իսկ եթե այդքան է նրանց ուժը և հայրենիքի նկատմամբ սերը՝ կեղծել սուրբ գիրքը, ուրեմն՝ իր դիակի վրայով. «Ես խոսում եմ իմ դիակի մասին, իսկ մնացած գործիչները՝ ուրիշների դիակների, հոկտեմբերի 27-ի ու մարտի 1-ի մասին են խոսում և մի բան թող ակնհայտ լինի, հայ ժողովուրդը հավատաց իր հաղթանակաին և թույլ չի տալու, որ մեր հայրենիքը դառնա դիակ»:
Շարունակելով եզրույթների շարքը՝ Րաֆֆի Հովհաննիսյանն ասաց, որ պիտի փորձի այլևս չօգտագործել սուտ, կեղծիք և վախ բառերը և նորից կրկնեց, որ մինչև ապրիլի 9-ը երկարատև երկունքից հետո ծնվելու է նոր Հայաստանը. «Այս սուտ ու կեղծիքի մեջ ասում են նաև հետևյալը, որ ես մերժել եմ որևէ հանդիպում: Դուք ինձ լավ ճանաչում եք, ես բաց եմ իմ ելույթների մեջ և ես ոտքովս եմ գնացել Բաղրամյան 26 և դրել ժողովրդի պահանջը: Ամեն ինչ մերժվեց, ես նրան հրավիրեցի Ազատության հրապարակ, նա չեկավ, պարոն Սարգսյան, ես չեմ մերժել որևէ առաջարկ»:
Նա համազգային տագնապը հաղթահարելու համար Սերժ Սարգսյանին հրավիրեց բաց կամ փակ քննարկման՝ հենց Ազատության հրապարակի նստարանի վրա: Նա նշեց, որ ինքը կողմ է բաց զրույցին, սակայն եթե պարոն Սարգսյանը չհամաձայնի, պատրաստ է գնալ մոտակա սրճարան, սուրճ խմել և զրուցել հետագայի մասին:
