«Վերելք» կենտրոնի ղեկավար, քաղաքական վերլուծաբան Արծրուն Պեպանյանը Facebook-ի իր էջում գրել է.
Րաֆֆի Հովհաննիսյանը նախագահական ընտրությունների արդյունքում ստացավ մեր հանրության, իրականությունից դժգոհ հատվածի, քվեն: Քաղաքական պայքարում հետագա հաջողությունն ապահովագրելու համար նրան հարկավոր էր իր շուրջը համախմբել ընդդիմադիր , կիսաընդդիմադիր առանցքային ուժերին:
Ինչ-ինչ պատճառներով դա նրան չհաջողվեց. մասնավորապես, ՀԱԿ-ը կամեցավ նախ գործողությունների ծրագիր տեսնել, ԲՀԿ-ն կարծես թե ինքն իրեն է տեսնում որպես միավորման առանցք, Նախախորհրդարանի առաջարկներն էլ կարծես թե չեն ընդունվում: Այնպես որ, եթե իրենց գործողությունները ժամանակավորապես սառեցրած քաղաքական ուժերը ակտիվանան սկսվող գարնան հետ, նամանավանդ՝ Երևանի ավագանու ընտրություններն են առջևում, ապա այժմյան բողոքավոր հատվածն ինքը ևս կտարաբաժանվի՝ գնալով ժամանակին իրենց կողմից սատարված ուժերի հետևից:
Այդ դեպքում չի բացառվում, որ Րաֆֆի Հովհաննիսյանին քաղաքական դաշտում բաժին ընկնի չորրորդական-հինգերորդական դերակատարություն, ինչպես եղել է մինչ 2013 թվականը:
Այնպես որ, Րաֆֆի Հովհաննիսյանի հացադուլի գնալու քայլը կարելի է դիտարկել նաև որպես ցայտնոտի մեջ հայտնված քաղաքական գործչի քայլ: Հիշենք, որ նա ոչ շատ առաջ հայտարարում էր, որ այլևս հացադուլի դիմելու հարկ չի լինի:
