ՀՀ նախագահի նախկին թեկնածու, «Ժառանգություն» կուսակցության առաջնորդ Րաֆֆի Հովհաննիսյանն Ազատության հրապարակում շարունակում է ավելի վաղ հայտարարած վախադուլը, կեղծիքադուլն ու հացադուլը: Այսօր առավոտից նրան տեսակցելու են եկել նրա թիմակիցները, հարազատները, համակիրները և ինչպես ինքն ասաց «Առաջին լրատվական»-ին՝ բազմաթիվ լրագրողներ:
Անդրադառնալով ՀՀ նախագահի մամլո խոսնակ Արմեն Արզումանյանի փոխանցած տեղեկատվությանը՝ ասաց, որ «Ժառանգություն» կուսակցության մամուլի քարտուղարը դրան կանդրադառնա: Ըստ Հովհաննիսյանի՝ դա հերթական բացարձակ սուտն է: Նրա խոսքով՝ սուտն ու կեղծիքը շարունակվում են նստավայրից:
«Իրենք ապատեղեկատվություն են տարածում և դիտավորյալ են դա անում: Ես հենց հիմա ասում եմ, ինչպես բազմաթիվ անգամներ ասել եմ, սպասում եմ պարոն Սարգսյանին իրեն հարմար ժամանակ գալ և այստեղ տղամարդը տղամարդու դեմ այս հարցը լուծել: Մենք կսպասենք դատարանի վճռին: Հույս ունենք, որ դատարանն իր այս կազմով իրավական, սահմանադրական դատավճիռ կկայացնի՝ այս հիմնահարցը հանգուցալուծելու, ժողովրդի հաղթանակը ճանաչելու համար:
Մինչև ապրիլի 9-ը ինքնաբացարկ եմ ակնկալում, որովհետև դա ժողովրդի պահանջն է, իսկ, ինքներդ գիտեք, մերժվել են իմ առաջարկները՝ բոլորն անխտիր, և դրանից հետո մի քանի անգամ հրավիրել եմ պարոն Սարգսյանին հրապարակ և անգամ հայտարարել, որ մինչև ամսի տասը ես պատրաստ եմ ժողովրդին պատկանող ցանկացած գրասենյակ գնալ և հանդիպել»,- ասաց Րաֆֆի Հովհաննիսյանը՝ շարունակելով, որ արդեն հրապարակում է, ուստի խնդրում է, որ Սարգսյանի դե ֆակտո վարչակազմը սուտ և կեղծիք չտարածի, քանի որ ինքը չի մերժել, միշտ կողմ է եղել հաղորդակցության:
Եզրափակելով իր խոսքը՝ նա ասաց, որ այս պահին ցանկացած ֆորմատով կարող է հանդիպել, եթե Սերժ Սարգսյանն ասելիք ունի: Րաֆֆի Հովհաննիսյանը նշեց, որ առավել մանրամասն կխոսի ժամը 17.00-ին, քանի որ որոշել են օրվա մեջ միայն երկու անգամ հանդիպումներ կազմակերպել լրագրողների հետ՝ ուժերը խնայելու և լրագրողների բոլոր հարցերին միանգամից պատասխանելու նպատակով: Ամեն օր Րաֆֆի Հովհաննիսյանը հավաքական հանդիպումներ կունենա ժամը 12.00-ին և 17.00-ին:
Հիշեցնենք, որ ՀՀ նախագահի մամլո խոսնակ Արմեն Արզումանյանն ասել էր, թե երեկ ՀՀ նախագահի աշխատակազմի ղեկավարը զանգահարել է Րաֆֆի Հովհաննիսյանին Սերժ Սարգսյանի հետ հանդիպման պաշտոնական հրավերը փոխանցելու համար: «Մենք ափսոսանքով ենք արձանագրում պարոն Հովհաննիսյանի մերժումը՝ հանդիպելու և մանրամասն ու համակողմանի քննության առնելու առկա բոլոր հարցերը»,- ասել էր Արմեն Արզումանյանը:
