Ռուսական Interfax լրատվական գործակալության փոխանցմամբ` Վրաստանը հասնելու է սահմանադրական ճանապարհով երկրի կազմ Աբխազիայի ու Հարավային Օսիայի վերադարձին: Այդ մասին այսօր հայտարարել է Վրաստանի վարչապետ Իրակլի Ղարիբաշվիլին` մեկնաբանելով Վրաստանի ու Հարավային Օսիայի վարչական սահմանին սահմանագծման նոր նշանների տեղակայումը:
«Մենք անպայման կմտնենք Աբխազիա և Օսիա ու մեր աբխազ և օս եղբայրների ու քույրերի հետ համատեղ կապրենք խաղաղ: Մենք դրան կհասնենք սահմանադրական ճանապարհով: Ինչ վերաբերում է վերջին օրերին Ցխինվալի շրջանի դեպքերի զարգացմանը, ապա դա սադրանք է: Մեր պետությունը թույլ չի տա որևէ ներքին կամ արտաքին սադրանք: Դա սկզբունքային հարց է:
Կա միջազգայնորեն ճանաչված Վրաստանի սահման, և այն ենթակա չէ վերանայման: Դա իրականություն է, որը երբևէ չի փոխվի: Ներկայիս իրավիճակը կարող է շարունակվել ևս մի քանի տարի, սակայն պատմական արդարությունն անպայման վերականգնվելու է»,- ասել է Վրաստանի վարչապետը:
