Ռուսաստանի Պրեմիեր լիգայի 2015/16 թթ. մրցաշրջանի մեկնարկային խաղում Մոսկվայի «Սպարտակ»-ը հյուրընկալել էր «Ուֆա»-ին:
Հյուրերը հանդիպման 12-րդ րոպեին առաջ անցան հաշվի մեջ՝ Հաջիչի գոլի շնորհիվ: Մոտ 12 րոպե անց Սերդար Տասկիին հաջողվեց հավասարեցնել հաշիվը:
31-րդ րոպեին մրցավարին հայհոյելու համար «Ուֆա»-ի ֆուտբոլիստ Ֆրիմպոնգը հեռացվեց խաղադաշտից և «Սպարտակ»-ը հիանալի հնարավորություն ուներ հաղթելու:
Այնուամենայնիվ, անգամ 10 հոգով խաղացող «Ուֆա»-ն երկրորդ խաղակեսում կրկին առաջ անցավ հաշվի մեջ: Գոլի հեղինակ դարձավ Դմիտրի Սոցկին: Սակայն 63-րդ րոպեին Յուրա Մովսիսյանին փոխարինած Զե Լուիշը խաղադաշտ դուրս գալուց 16 րոպե անց հիանալի գործեց և կարողացավ հավասարեցնել հաշիվը՝ իր թիմին պարգևելով մեկ միավոր:
Հանդիպման վերջին 15 րոպեները անցան «Սպարտակ»-ի բացահայտ առավելությամբ: Մոսկովյան ակումբը կարող էր հաղթել այս խաղում, եթե չլիներ «Ուֆա»-ի հայազգի դարպասապահ Դավիդ Յուրչենկոն: Նա հանդիպման ընթացքում, անկասկած, լավագույնն էր:
Հավելենք, որ Հայաստանի ազգային հավաքականի մեկ այլ ֆուտբոլիստ Արաս Օզբիլիսը հայտավորված էր «Սպարտակ»-ի պահեստայինների նստարանին, բայց խաղադաշտում այդպես էլ չհայտնվեց:
