Այսօր՝ հուլիսի 15-ին, հայտարարությամբ են հանդես եկել ընդեդեմ էլեկտրաէներգիայի թանկացմանն ուղղված քաղաքացիական շարժման Գյումրու համակարգող խմբի անդամներն ու Գյումրու Թատերական հրապարակում տեղի ունեցած շուրջ երկշաբաթյա նստացույցի մասնակիցները իրենց տարակույսն հայտնելով ՀՀ Ոստիկանության և ՀՀ Ոստիկանապետի որդեգրած կեղցվածքի հանդեպ՝ առ Գյումրիում տեղի ունեցած բողոքի ակցիաներն ու ակտիվիստ Կարեն Պետրոսյանի հանդեպ հարուցված քրգործի իրավաչափությունը:
Մեջբերում ենք հայտարարությունն առանց միջամտության:
«Մենք՝ Գյումրու խաղաղ նստացույցի մասնակիցներս, պատկերացում ունենալով Երևան և Գյումրի քաղաքների միջև եղած հեռավորության մասին, չենք կարող մեր տարակուսանքը չհայտնել ՀՀ Ոստիկանապետ Վ. Գասպարյանի կողմնակալ մոտեցման շուրջ, համաձայն որի՝ հունիսի 23-ին միայն Երևան քաղաքի Բաղրամյան պողոտայում գտնվող ՀՀ քաղաքացիների նկատմամբ օրենքի կոպիտ խախտումներ թույլ տված ոստիկանները ենթարկվեցին այս կամ այն աստիճանի կարգապահական տույժերի: Եթե 120կմ-երը տեղեկատվական և մասնագիտական անջրպետ չեն հանդիսացել ՀՀ ոստիկանապետի համար՝ Գյումրիում տեղի ունեցածի շուրջ պատկերացում կազմելու և համապատասխան քայլեր ձեռնարկելու համար, ապա կարող ենք միայն ենթադրել, որ այս կերպ Գյումրիում խաղաղ նստացույցի մասնակիցներին օրենքի կոպիտ խախտումներով բերման ենթարկելու փաստը ուղղակիորեն հավանության է արժանացել ՀՀ ոստիկանապետի կողմից:
Եթե մեր ենթադրություններում սխալվում ենք, ապա ակնկալում ենք շատ շուտով ականատես լինել ևս մեկ համարձակ քայլի ավելի բարեփոխված Ոստիկանություն ունենալու ճանապարհին: Կարեն Պետրոսյանին հունիսի 23-ի գործողությունների մասով քրեական գործում որպես մեղադրյալ ներգրավելու փաստի շուրջ մեր դիրքորոշումը մնում է անփոփոխ. այն է՝ անընդունելի է ՀՀ ակտիվ քաղաքացու հետ խոսել «լռեցնելու» լեզվով: Ինչպես հայտարարել էինք, անկալում ենք գործի շուտափույթ կարճում:
Վերջին օրերի ընթացքում գործի բովանդակության պարզման և արդեն իրավական հիմքերով գործի բնույթին ավարտական գնահատական տալու նպատակով Կ. Պետրոսյանի փաստաբանի կողմից ՀՀ դատախազություն ներկայացվել են մի քանի միջնորդություններ, որոնց պատասխաններ ստանալը և մեր կողմից ներկայացված բարոյական ու քաղաքացիական գնահատականների հետ համադրումը և միայն դրանից հետո համարժեք քայլերի ձեռնարկելն այս պահին համարում ենք հիմնավորված:
Տաս օրն է այն ժամկետը, որն այս պահին բաժանում է մեզ իրավական գործընթացների ավարտական գնահատական ստանալու և կախված այդ գնահատականից ՀՀ պահանջատեր քաղաքացու իրավունքները և շահերը պաշտպանելու ՀՀ սահմանադրությամբ ու օրենքներով ամրագրված բազմաբնույթ քայլեր ձեռնարկելու գործում: Եվս տաս սպասման օրեր, որոնք մենք կանցկացնենք իրապես իրավական երկրում ապրելու ցանկությամբ, հույսով և վճռականությամբ:
Հետգրություն՝ Շիրակի բարեփոխված ոստիկանապետի ակնկալիքներով.
Գյումրու խաղաղ նստացույցի մասնակիցներ 15 հուլիս 2015թ
