ԿԺԴՀ-ի կառավարությունը հրավիրել է ԱՄՆ նախագահ Բարաք Օբամային, Կոնգրեսի անդամներին և ԱՄՆ կառավարության ողջ անձնակազմին գալ Փհենյան: Նրանց առաջարկել են ստուգել, թե կա՞ արդյոք Հյուսիսային Կորեայում կենսաբանական զենք և առաջարկել են ծանոթանալ երկրում մարդու իրավունքների պաշտպանության հետ կապված իրավիճակին: Այդ մասին հայտարարում է «Yonhap»-ը:
ԿԺԴՀ-ի պաշտպանության կոմիտեի պաշտոնական ներկայացուցչի խոսքերով՝ ամերիկացի պաշտոնյաները կարող են իրենց աչքերով տեսնել «Փհենյանի կենսատեխնոլոգիայի գաղտնի ինստիտուտը»: «Նրանք նաև կարող են տեսնել, թե ինչ է իրենից ներկայացնում հասարակությունը, որտեղ իսկապես երաշխավորում են մարդու իրավունքների պաշտպանությունը»,- խոստացել է նա:
Հյուսիսային Կորեայի ուսումնասիրություններին նվիրված 38 North կայքում հունիսի 9-ին հրապարակվել էր ամերիկյան՝ Խնդիրների լուծման կենտրոնի աշխատակից Մելիսա Հենխեմի զեկույցը, որում հաստատվում է, որ Փհենյանի Կեաստեխնոլոգիայի ինստիտուտը տիրապետում է սիբիրյան խոցի մանրէների աճեցման անհրաժեշտ միջոցներին, ինչը կարելի է օգտագործել որպես կենսաբանական զենք:
Ինչպես տեղեկացնում է Ռիա Նովոստին, հուլիսի 12-ին ՄԱԿ-ում ԿԺԴՀ-ի մշտական ներկայացուցիչը մեղադրել է Վաշինգտոնին Կորեական թերակղզում պատերազմի դեպքում Փհենյանի դեմ կենսաբանական զենք կիրառելու մտադրության մեջ: Նա նաև պահանջել է հետաքննություն սկսել ԱՄՆ-ից Հարավային Կորեա սիբիրյան խոցի մանրէներ ուղարկելու փաստով: Մայիսին Պենտագոնը խոստովանել էր, որ պատահաբար Հարավային Կորեայում տեղադրված ամերիկյան զինուժի ռազմաբազա են ուղարկել սիբիրյան խոցի նմուշներ: Վաշինգտոնը և Սեուլը այդ հարցով հետաքննություն են անցկացնում:
